اسلام آباد۔ 12مارچ(اے پی پی) صدر مملکت ڈاکٹر عارف علوی پارینے کہ پاکستان و ترکمانستان نا نیام اٹ اسیجا عقیدہ، دودوربیدگ و تاریخ آ مبنی خڑکی و خوشگوار برادرانہ تعلقداریک گنڈوک ءُ، ہڑتوم آ ملک آتا امن ، شونہالی و شونداری نا اسیجا مسخت آک دارابطہ غاتے پین سوگوی تسنو۔ اوداہیت ءِ ترکمانستان نا کابینہ نا ڈپٹی چیئرمین و وزیر خارجہ راشد میریدوف اویزجیلدیوچ تون گپ و تران کرسا پارے ہرا سے شنبے نادے آ ایوان صدر اٹی اوڑتون اوڑدہی کرے۔ صدر پارے کہ ہڑتوم آ ملک آتا نیام اٹ ہڑتوم آ کنڈآتا و اقوام متحدہ ، او آئی سی و ای سی او تون اوار کثیر الجہتی فورم تیا خڑکی کمکاری ءِ۔ اوداہیت آ زور شاغاکہ پاکستان امن پسند ءُ ملک اسے و تینا غٹ ہمسایہ غاتون گچین تعلقداری تا خواہندار ءِ۔ اوپارے کہ پاکستان تین پہ تینی است خواہی نا غٹ معاملہ غاتیا بھارت تون ہیت وگپ کننگ و سویلی ایشیا ٹی بے چیٹی تے کم کننگ کن اواری اٹ کاریم کننگ کن تیار ءِ۔ اوپارے کہ پاکستان نا است خواہی ءِ کہ غٹ سنگت ملک آک بھارت آ زور شاغر کہ او اقوام متحدہ نا سلامتی کونسل نا قرارداد آتا رداٹ کشمیر نا جھیڑہ نا پرامن ایسری کن پاکستان تون کاریم کے۔ صدر مملکت و ترکمانستان نا وزیر خارجہ ترکمانستان، اوغانستان، پاکستان، بھارت (تاپی ) گیس پیپ لین ڈٹ آ زوت عملدرآمد آ امنا کریر۔ صدر پارے کہ پاکستان تینا گل زمین آ تین پہ تینی وڑاٹ امنائی تاریخ آ تاپی گیس پیپ لین ڈٹ انا بنداو نا دود اس اڈتننگ نا ڈٹ بندی کننگ ءِ۔ او پاکستان ءِ اسہ ہزار میگاواٹ بجلی برآمد کننگ و پاکستان اوغانستان و ترکمانستان نا نیام اٹ بین الحکومتی معاہدہ غا دستخط کننگ کن ترکمانستان نا سلہ نا ہم خیرمقدم ءِ کرے۔ صدر پارے کہ ہڑتوم آ ملک آتا نیام اٹ ساڑی واپاری کچ، ساڑی وارخواہی و تین پہ تینی خوشگوار تعلقداری تیان ہم گرنچ اف۔ او داہیت آ زور شاغاکہ ہڑتوم آ کنڈآتا واپار و اقتصادی تعلقداری تے پین ودفنگ نا گرج ءِ ۔ اوپارے کہ کشت وکشار، جوڑ جاڑ، ادویہ سازی و انفارمیشن ٹیکنالوجی تون اوار چندی بشخ آتے ٹی اسیجا ڈٹ پٹنگ نا گرج ءِ۔ ڈاکٹر عارف علوی پارے کہ پاکستان مچ آ ڈیہہ و الس نا راجی آسراتی کن علاقائی رابطہ غاتے ٹی ودکی نا خواہندار ءِ۔ پاکستان گوادر نا بندرگاہ و تینا قومی شاہراتی و ریل نیٹ ورک نا کمک اٹ ترکمانستان ءِ گونڈ ءُ کسر اس تننگ کیک۔ اوجاڑ انگا بندرگاہ و رابطہ غاتا بارواٹ گوادر و ترکمانستان نا نیام اٹ ایم او یو ءِ زوت گڈیکو دروشم اس تننگ نا گرج آ ہم زور شاغا۔
