گلگت بلتستان کن پی ایس ڈی پی پروگرام اٹی ہمو ڈٹ آتے اولیت تننگک ہرا پوروی نا مرحلہ غاتے ٹی ءُ، علی امین گنڈاپور

اسلام آباد۔ 12مارچ(اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ آزاد کشمیر و گلگت بلتستان کن پی ایس ڈی پی پروگرام اٹی ہمو ڈٹ آتے اولیت تننگک ہرا پوروی نا مرحلہ غاتے ٹی ءُ۔ داہیت ءِ او سے شنبے نادے آ داڑے آزاد کشمیر و گلگت بلتستان کن پی ایس ڈی پی پروگرام ءِ گڈیکو دروشم اس تننگ نا بابت اڈ ہلوک آ دیوان نا کماشی ءِ کرسا پارے۔ دیوان اٹی بنجائی سیکرٹری امور کشمیر و گلگت بلتستان طارق محمود پاشا، جوائنٹ سیکرٹری وزارت امور کشمیر وگلگت بلتستان آن بیدس وزارت نا بڑزکو کمامدارآک ساڑی ئسر۔ اوپارے کہ بروک آ مالی سال انا پی ایس ڈی پی پروگرام اٹی ہمو ڈٹ آتے اولیت تننگ انگ ءِ ہرا پوروی نا آخریکو مرحلہ غاتے ٹی ءُ و ہرا الس نا گچین فائدہ غاتے ٹی ءُ۔ اوپارے کہ وزیراعظم عمران خان نا وژن نا رداٹ الس ءِ تعلیم و جان جوڑی کون آ بنداوی آسراتی تا فراوانی حکومت نا اولیت ءِ و حکومت تعلیم و جان جوڑی نا بابت ڈٹ آتیا خصوصی چکار کننگ ءِ۔ بنجائی وزیر داہم پارت کرے کہ زیر التواء ڈٹ آتے زوت آن زوت پورو کننگ کن دمدستی گام گیج کننگے و ڈٹ آتا پوروی ٹی بروک آ اڑاند آتے مر کننگ کن متحرک وڑاٹ کاریم کننگے۔ اوپارے کہ اونا حکومت آزاد کشمیر و گلگت بلتستان اٹی سیل وسوات نا بشخ ءِ مون آ دننگ کن ہم ہلہلئی بنداو تیا کاریم کننگ ءِ تانکہ دا علاقہ غاتے مالی وڑاٹ خودکفیل کننگ مرے و آزاد کشمیر و گلگت بلتستان اٹی شونداری و شونہالی نا پوسکن ءُ بنداو اس تخنگ مرے۔