مچ آ دنیا غان یو این کمیشن آن سٹیٹس آف ویمن نا سالانہ دیوان اٹی بروک آ مندوبین تا مون آ پاکستان اٹی انسداد دہشت گردی نا حکمت عملی ٹی صنفی پلو نا اوار مننگ نا گام گیج آتے تالان کرے
اقوام متحدہ۔ 12مارچ(اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی مچ آ دنیا غان بروک آ مندوبین تا مون آ پاکستان اٹی انسداد دہشت گردی نا حکمت عملی ٹی صنفی پلو نا اوار مننگ نا گام گیج آتے تالان کرینے۔ داخیال آتا درشانی ءِ او یو این کمیشن آن سٹیٹس آف وویمن نا سالانہ دیوان اٹی اڈ ہلوک آ دود آن تران کرسا کرے ہرانا میزبانی ءِ پاکستان ، ترکی ، ایران، قطر ، انڈونیشیا ، کینیڈا و گیمبیا اواری اٹ کریر۔ بروک آ اِراہفتہ اسکان برجاسلوک آ سالانہ دیوان اٹی مچ آ دنیا غان راجی تنظیم تا 9 ہزار آن زیات مندوبین بشخ ہلکنو۔ دا سال دیوان نا سرحال راجی رکھ انا نظام، سرکاری آسراتی تسکان رسینگ و صنفی بریبری و پائیدار شونداری نا ایجنڈا 2030ء نا بارواٹ مرغن ءُ شرہ مریک۔ دیوان آن تران اٹی پاکستانی مندوب پارے کہ پاکستان نا الس و سیکورٹی فورس آک تدوک آ کیہی عشرہ غاتے ٹی ڈیہہ ٹی دہشت گردی ٹی ودکی تون مون تسنو،ہرا بھلو وخت اسے آن ایسر نا چاری جھیڑہ و افراتفری نا بھرم ءِ، و ہرانا بنداوی سوب درملکی نیام تمنگ و ننا ہمسایہ ملک آتے ٹی بھلو وخت اسے آن برجاجھیڑہ غاک ءُ۔ پاکستانی مندوبین پارے کہ پاکستان نا الس و سیکورٹی فورس آک دہشت گردی نا چیلنج تون مون تننگ کن بے مٹ جیرت نا درشانی ءِ کریر و اودے باتسر۔ ڈاکٹر ملیحہ لودھی بشخ ہلوک آتے پارے کہ پاکستان اٹی دہشت گردی آن زہمی علاقہ غاتے ٹی بحالی ٹی زالبول ءِ اقتصادی وارخواہی نا فراوانی کن اوفتے کن تربیتی پروگرام تیا چکار کننگانے و دا عمل اٹی نجی بشخ، ذرائع ابلاغ و مذہبی راہشون تے ہم اوار کننگانے۔ دا بابت دہشت گردی نا برخلاف و صنفی بریبری کن مذہبی عالم تا فتو اک خاص وڑاٹ قابل ذکر ءُ۔ پولیس و سیکورٹی فورس آتے ٹی زالبول ءِ وارخواہی تننگ انگ ءِ۔ حکومت ورناتے انتہا پسندی آن کشسا راج انا بنجائی دنگ اٹ اتنگ کن بحالی ہندجاٹ جوڑ کرینے و دارداٹ صباؤن و ایلو این جی اوتا خذمت آتے ہم دوئی کرینے۔ داڑتون اوار اوار بے نظیر انکم سپورٹ پروگرام نا کمک اٹ ہم زالبول نا مالی کمک ءِ کننگ انگ ءِ۔ جامع یوتھ پروگرام نا کمک اٹ ورناانگا مار و مسن تے کسبکار جوڑ کننگ تون اوار اوار اوفتے وام تننگ و اوفتا بڑزکو تعلیم اسکان رسینگ نا گام گیج ہم کننگ انگ ءِ۔ داوخت آ ایلو ترانکار آک ہم زالبول آتے واکدار کننگ و اوفتے زیات وارخواہی تننگ آ گپ و تران کریر۔ اوفک دہشت گردی نا چٹفنگ کن کثیر جہتی حکمت عملی اس جوڑ کننگ و داحکمت عملی ٹی زہمی زالبول آتا کمکاری ءِ اوار کننگ نا گرج آ زور شاغار۔ دا ترانکار آتے ٹی قطر انا وزیر انتظامی شونداری و خواری و راجی امور یوسف محمد العثمان فخرو، نائیجیریا نا وزیر امور نسواں و راجی شونداری عائشہ ابوبکر، عراق نا نائب وزیر امور خارجہ ہالہ شاکر مصطفےٰ سلیم، اقوام متحدہ نا انڈر سیکرٹری جنرل انسداد دہشت گردی ولادی میر وورونکوف، یو این کاؤنٹر ٹیرارزم ڈائریکٹوریٹ نا اسسٹنٹ سیکرٹری جنرل مشعل کوننسکس و یو این آفس آن ڈرگز اینڈ کرائم نا ڈائریکٹر سیمونی موناسبیان اوار ئسر۔
