بزگری ءِ ھلاسی ءُُ معاشی دیمروئی ءِ واستہ 50لکھ گس آنی جوڑیشت ءِ پروگرام حکومت ءِ فلیگ شپ منصوبگ انت، مزن وزیر عمران خان
اسلام آباد ۔ 11 مارچ (اے پی پی) مزن وزیر عمران خان ءَ بزگری ءِ ھلاسی ءُُ معاشی دیمروئی ءِ واستہ 50لکھ گس آنی جوڑیشت ءِ پروگرام ءَ را حکومت ءِ فلیگ شپ منصوبگ نامینان ءَ گوشت کہ استیں حکومت ءِ سسا گوستگیں حکومت آں چہ جتا انت، گریبی ءِ ھلاسی ءِ واستہ کمو ھرچ ءُُ درچ ءَ چہ جوڑ بوھوکیں گس آنی جوڑیشت ھمے سسا آنی یک بھر ات، اسٹیٹ بینک ءِ نیمگ ءَ چہ کمو ھرچ ءُُ درچ ءَ چہ جوڑ بوھوکیں گس آنی جوڑیشت ءِ واستہ وام ءِ پجارینگ یک ٹوھیں گام ات، اے منصوبگ ءَ چہ کساس 40سیادی داروکیں جوڑیشتی کارخانہ برجا بنت، روزگار ءِ پراھ ءُُ شاھیگانیں موہ پیداک بنت، معیشت دیمروئی کنت، حکومت شہری آنی گیش دور ءُُ گستا نندگ ءِ مٹ ءَ ھور ماڑی آنی تہ ءَ نندگ ءِ واستہ واھشت ایگ انت، آ دو شمبے ءِ روچ ءَ سٹیٹ بینک ءِ کمو ھرچ ءُُ درچ ءَ چہ جوڑ بوھوکیں گس آنی واستہ فنانس ءِ بنگیج کنگ ءِ مراگش ءَ گوں گشتانک دیگ ءَ ات۔ مراگش ءَ گوں وزیر ءِ ھزانگ اسد عمر، گورنر سٹیٹ بینک طارق باجوہ ءَ ھم گشتانک دات۔ مزن وزیر عمران خان ءَ سستائیں گس ءِ فنانسگ ءِ واستہ آسراتی دیگ ءِ پد ءَ گورنر سٹیٹ بینک ءَ را ساڑات ءُُ گوشت کہ استیں حکومت ءِ سسا گوستگیں حکومت آں چہ جتا انت، پسر ءَ سسا مٹ بنت پدا ایشی ءِ سر ءَ کار کنگ بیت۔ وھد ءِ مئے حکومت سروکی ءَ اتک گڈا مئے کوشت بوتگ کہ انچیں پالیشی جوڑ بہ بیت ھمائی ءَ چہ ملک ءِ جھلی تبک ءِ مردم آناں برز ءَ آرگ بہ بیت ءُُ گریبی ءَ را ھلاس بوت بوت بہ کنت۔ گوستگیں وھد ءُُ پاس ءَ ناشرکاری ءِ ھلاپ ءَ جنگ ءَ سک باز تباھی بوتگ۔ مزن وزیر ءَ گوشت کہ قبائلی دمگ آنی استیں مردم آنی واستہ سکیں ضلورتی چیز گس اِنت۔ آئی ءَ اسٹیٹ بینک ءِ نیمگ ءَ ٹرانس جینڈرز (خواجہ سرا) دُولومب آنی واستہ اے رد ءَ آسراتی پجارینگ ءِ کار ءَ را ساڑات۔ آئی ءَ گوشت کہ ما اسلام آباد ءَ را ماڈل سٹی جوڑ کنگ ءِ پیسلہ کتگ۔ ما اے دمگ آناں نشان داتگ ایشانی تہ ءَ ایوی ایشن ءِ سبب ءَ بُرزیں ماڑی جوڑ بوت نہ کنت، بلے ایندگر جاھ آں ٹوھیں ماڑی جوڑ کنگ ءِ سر ءَ اچ بندش نہ بیت، نوک جوڑ بوتگیں آباتیں دمگ آنی سر ءَ نندوکیں مردم آناں مالک بوھگ ءِ ھک ءَ دیاں ءُُ ایشانی واستہ فلیٹس ءِ جوڑیشتی ءَ ھوار کمرشل سینٹرز جوڑ کناں۔ آئی ءَ گوشت اے بندات انت۔
