اسلام آباد۔ 27 فروری (اے پی پی) بھارتی قائم مقام ہائی کمشنر گوراواہلووالیا ءِ چارشنبے نادے آ دفترخارجہ غا بٹنگسا 26فروری آ لین آف کنٹرول آ نکیال و کھوئی رٹہ سیکٹرآتے ٹی بھارتی کوزہ گر فوج انا کنڈآن سیز فائر نا بے خار خلاف ورزی نا مذمت ءِ کننگا ہراٹی چار بے گناہ شاری موتیا بی بی ، زرینہ ، گلفراز و شہناز شہید مسر وخت اس کہ 6پین ٹھپی مسر۔ ترجمان دفتر خارجہ نا کنڈان جاری بیان نا رداٹ ڈائریکٹر جنرل (سویلی ایشیا و سارک) ڈاکٹر محمد فیصل بھارتی قائم مقام ہائی کمشنر ءِ بٹنگا و سیز فائر نا بلااشتعال خلاف ورزی تا مذمت ءِ کرے۔ لین آف کنٹرول و ورکنگ باؤنڈری آ بھارتی فوج بھلو سلہہ سے تون پدریسہ شاری آبادی نا علاقہ غاتے نشانہ کننگ ءِ، بھارت نا کنڈان 2017 ء (ہراٹی بھارتی فوج سیز فائر نا 1970 خلاف ورزی کرے) آن سیز فائر نا پدریسہ خلاف ورزی نا کمک اٹ بے چیٹی تیٹی بھلو ودکی اس کننگ انگ ءِ۔ بیان نا رداٹ شاری آبادی نا علاقہ غاتا دانستہ ہدف کننگ درحقیقت است ہسونی نا قابل و انسانی وقار، جہانی بنداوی حق و انسانی ہمدردی کانود آتا منافی ءِ۔ بھارت نا کنڈان سیز فائر نا خلاف ورزی علاقائی امن و سلامتی کن گڑتی اسے و تزویراتی غلط اندازہ نا سوب مننگ کیک۔ ڈائریکٹر جنرل ڈاکٹر محمد فیصل بھارت آ زور شاغا کہ او 2003 ء نا سیز فائر معاہدہ نا شر ف ءِ کے، داواقعہ و سیز فائر نا ایلو خلاف ورزی تا جاست وپاست ءِ کے و بھارتی فوج ءِ لین آف کنٹرول و ورکنگ باؤنڈری آ جوان وڑاٹ سیز فائر نا شرف ءِ کننگ نا پارت کننگے۔ اوداہیت آ ہم زور شاغا کہ بھارت نا کنڈان اقوام متحدہ نا سلامتی کونسل نا تعلقدار قرارداد آتا رداٹ اقوام متحدہ نا فوجی مبصر مشن بھارت وپاکستان (یو این ایم او جی آئی پی) ءِ مینڈیٹ نا رداٹ تینا کڑد ءِ ادا کننگ نا بایدے موکل تننگے۔
