اسلام آباد۔ 04مئی (اے پی پی) صدر مملکت ممنون حسین پارینے کہ بدعنوانی کون آ ویل آک پاکستان ئِ بھاز نسخان تسنوواہم داساحالیت آک بدلینگانو۔زند انا ہر بشخ آن تعلق تخوک آ بندغ آک دیانتداری اتون تینا زمہ واری تے سرانجام ایترہ تو ہچ ئُ سوب اس مفک کہ نن مون آ ہنپن۔ ساڑی آ حکومت سہی سمت اٹی روان ئِ۔ پوریا گر و صنعت کار آتون اوار ہر بندغ ئِ سی پیک و ایلو بھلا ڈٹ آتا پوروی اٹی سات تروئی مرے۔ پاکستان اسہ پرامن ئُ ملک اسے وپڑوسی ملک آتون اوار غٹ دنیا تون بریبری نا بنداو آ گچین تعلقداری تا خواہندار ئِ۔ او بنجائی ایوان ہائے صنعت و واپار پاکستان نا چارمیکو اچیومنٹ ایوارڈز نا دود آن تران کریکہ۔ صدر مملکت پارے کہ داسا معیشت ئِ سیاست نا برتری دوئی ئِ، ہراملک انا معیشت سوگو مریک ہموڑے سیاست ہم جوان مریک۔ دابابت چین انا مثال ننا مون آٹی ئِ۔ صدر مملکت پارے کہ معیشت گچینی نا کنڈاروان ئِ ملک انا غٹ بھلا اقتصادی ٹک آک گچین نتیجہ نشان تننگ ئُ۔ پاکستان اٹی مسکوہی ٹی مروک آ بدعنوانی و بد انتظامی آن بھاز نسخان مسنے ولے داسا حالیت آک بدل مسنوو درست سمت اٹی کاریم کننگ انگ ئِ ، حکومت سی پیک تون اوار اوار توانائی و انفراسٹرکچر نا بھلا بھلا ڈٹ آتیا کاریم کننگ ئِ ہرافتا پوروی آن پاکستان ڈیہہ نا اہم انگا ملک جوڑ مریک۔ اوپارے کہ ہربندغ ئِ داکاریم اٹ حکومت تون کمک کروئی مرے و کوشست کروئی مرے کہ دا ڈٹ آتا کسر اٹی ہچ ئُ اڑاند اس بف ۔ صدر مملکت پارے کہ پاکستان بھارت تون اوار غٹ ملک آتون بریبری نا بنداو آ گچین تعلقداری تا خواہندار ئِ وداہیت آ پکا یخین تخک کہ مقبوضہ جموں و کشمیر نا ویل ئِ ہچ ئُ دروشم اسیٹی پد شاغنگ مفک۔ اوپارے کہ بھارت تون ہراوخت آ ہیت و گپ مس تو پاکستان ہمیش کشمیر نا ویل ئِ چست کرینے۔ اوپارے کہ پرامن اوغانستان پاکستان نا مفاد اٹی ئِ۔ اومیت ئِ کہ اوغانستان نا حکومت و اوغان طالبان تا نیام اٹ ہیت و گپ نا بابت اِرا مسہ تو اٹی جوان ئُ پیش رفت اس مریک۔ صدر مملکت پارے کہ پاکستان امن پسند ئُ ملک اسے وہر ملک اتون ہیت وگپ کن تیارئِ ۔ صدر مملکت پارے کہ نمان سرسہبی دوئی کروک آ پوریاگر و صنعت کار آتے ایوارڈ تننگ نا دود اٹی شرکت اوڑکن اسہ خوشگوار ئُ تجربہ اس مسنے۔ ملک انا پوریا گر و صنعت کار آک معیشت ئِ سوگوی تننگ نا نیک کاریم اٹی اختہ ئُ۔ اوفتے تون خیال آتا درشانی ٹی گچین سلاہ مون آ بریک۔ صدر مملکت پارے کہ ملک انا شونہالی و وقار اٹی ودکی کن پوریا گر و صنعت کار آتا خذمت آ تیا اوفتا عزت افزائی ئِ کننگ انگ ئِ۔ اومیت ئِ کہ او پین وخت اس ہم ہندا وڑڈول آتیا خذمت سرانجام ترسا کیرہ۔ صدر مملکت صنعت کار و برآمد کروک آتیا زورشاغا کہ او روایتی مارکیٹ آتون تینا مصنوعات آتے کن پوسکن ئُ منڈی ہم پٹر ، دا چرجوئی ٹی افریقہ ، نیامی ایشیاءو دے ٹکی بعید انا مون آ بروک آ مارکیٹ آتیا توجوہ تننگ نا گرج ئِ۔ دود اٹی صنعت و واپار تون وابستہ 73پنی شخصیت آتے ایف پی سی سی آئی اچیومنٹ ایوارڈز تننگا۔ داوخت آ صدر مملکت ئِ فیڈریشن نا یات گاری شیلڈ ہم پیش کننگا۔ گورنر پنجاب محمد رفیق رجوانہ، بنجائی وزیر، پارلیمنٹ نا باسک آک، کیہی ملک آتا سفارت کار و مچ آ ملک آن کاروباری برادری نا نمائندہ غاک ہم دود اٹی شرکت کریر۔
