ڈیرہ مراد جمالی ۔ 04مئی (اے پی پی) بنجائی وزیر مملکت و چیئرپرسن بے نظیر انکم سپورٹ پروگرام گودی ماروی میمن پارینے کہ روچہ غان پد بلوچستان نا مسہ ضلع نصیر آباد، کیچ و قلعہ سیف اللہ ٹی حقدار نیاڑی تے بی آئی ایس پی نا دنگ اٹی اتنگ کن پوسکن ئُ سروے اسینا بناءکننگک ، حقدار آ نیاڑیک رجسٹرڈ نا عمل اٹی پبی بشخ ہلسا دا پروگرام نا بھرم آتیان فائدہ ہرفیر۔ داخیال آتا درشانی ئِ او چارشنبے آ ڈیرہ مراد جمالی بی آئی ایس پی نا دفتر و گوٹھ غلام محمد سرپرہ منجھوشوریٰ گوٹھ شوکت بنگلزئی ٹی حقدار آتا بی آئی ایس پی نا تحت زیات آن زیات رسائی و رابطہ غاتا حکمت عملی نا پروگرام نا چرجوئی ٹی نیاڑی تا مچی تیان تران کرسا کرے۔ اوپارے کہ مسکوہی دور اٹی بی آئی ایس پی نا بلوچستان اٹی مروک آ سروے او کہول آ متو ہراڑآ مروئی ئسک اونسخان نا ازالہ کن پوسکن ئُ سروے اسینا بنا کننگ انگ ئِ ہراکہ باالکل مفت مریک او سروے ٹی پوسکن رجسٹریشن آتون اوار اوار او نیاڑی تے ہم دُوارہ رجسٹریشن کرفوئی مریک ہرا دا پروگرام آن مست آن استفادہ کننگ ئُ۔ اوپارے کہ بلوچستان نا تالان مروک آ آبادی و تالان مروک آ خلق آتے ٹی موبلائزیشن و نیاڑی تے معاشی وڑاٹ سوگو کننگ نا گرج ئِ ، ساڑی آ الس دوست حکومت نیاڑی تے معاشی وڑاٹ سوگو کننگ کن بی آئی ایس پی نا تحت جامع پروگرام اس شروع کرینے۔ وزیراعظم محمد نواز شریف نا پارت آ دا پروگرام نا دنگ انا زیات آن زیات حقدار نیاڑی تسکان ودفنگ کن گام گیج چست کننگ انگ ئِ۔ وزیراعظم نا پارت آ مر مر انگا علاقہ غاتے ٹی حقدار نیاڑی تسکان ہنسا پروگرام نا بھرم آتے اوفتا درگہ غا سرکننگ اُن۔ اوپارے کہ وزیراعظم پارت جاری کرینے کہ نیزگار وحقدار آتا حق بایدے اوفتے ضرور ملے، وزیراعظم و بنجائی وزیر خزانہ نا پارت آتے مون آ تخسا بے نظیر انکم سپورٹ پروگرام نا تحت ملک اٹی رہینگوک آ نیزگار بندغ آتا سَاف و شفاف مہشون آتے مرتب کننگ انگ ئِ دا رداٹ دیانت داری و نیک نیتی اٹ کاریم کننگ انگئِ۔ اوپارے کہ دا پروگرام ئِ وسیع تر جوڑ کننگ کن لسٹ مچ آ دنیا کن شفافیت آ مبنی اسہ ہندن ئُ عملی نمونہ اس مریک ہراڑآن دنیا نا ایلو بندغ آک ہم ننے آ برسا ایل کیر۔ اوپارے کہ عملی وڑاٹ الس نا خذمت ئِ کننگ اُن وخت اس کہ ایلو بندغ آک دھرنہ ، توڑ پھوڑ نا سیاست اٹی تینا وخت ئِ تدیفنگ ئُ۔ وزیراعظم محمد نواز شریف نا سیاست نامسخت الس نا شونہالی ئِ و او مسخت آ حکومت السی خذمت ئِ شعار جوڑ کرینے اوپارے کہ اینخو نا سال پائلٹ پروجیکٹ آن بیدس ملک انا ایلو ضلع غاتے ٹی 2017ءٹی سروے مریک ہراٹی اوکان مست سلوک آ غٹ حقدارنیاڑی تے دا پروگرام اٹی اوار کننگک، مسکوہی دور اٹی ہندن انگا بندغ آتے ہم دا پروگرام اٹی اوار کننگا ہرا دانا حقدار ہلوسہ واہم مسکوہی نا نسخان نا ازالہ اسہ پوسکن ئُ شفاف سروے سینا ذریعہ کننگک بلوچستان اٹی پوسکن آ وزیراعلیٰ نواب ثناءاللہ خان زہری حکومت نا بھاگ دوڑ ئِ سنبھالانے واونا کمکاری آن بلوچستان اٹی بی آئی ایس پی پروگرام آ گچین وڑاٹ عملدرآمد مریک۔ وزیراعظم نواز شریف سہ ماہی زر ئِ ودفسا 4ہزار 7سد روپئی کرینے اوکان مست وزیراعلیٰ بلوچستان نا سلاہکار حاجی محمد خان لہڑی چیئرپرسن بے نظیر انکم سپورٹ پروگرام نا گودی ماروی میمن ئِ نصیر آباد آ بننگ آ ببوخیرٹ پارسا پارے کہ صوبائی حکومت بی آئی ایس پی تون ملسا نیاڑی تے معاشی وڑاٹ سوگو کننگ کن پرعزم ئِ و دارداٹ ہر وڑکمکاری کننگک۔ داوخت آ ڈائریکٹر بلوچستان بی آئی ایس پی عبدالرﺅف خان بنجائی وزیر مملکت و چیئرپرسن بے نظیرانکم سپورٹ پروگرام گودی ماروی میمن ئِ بلوچستان اٹی بی آئی ایس پی پروگرام آن فائدہ ہرفوک آ نیاڑی تا حساب وکتاب و دائرہ کار آن آگاہی تس۔
