اسلام آباد۔ 19جنوری (اے پی پی) بنجائی وزیر شونداری و ڈٹ بندی پروفیسر احسن اقبال پارینے کہ قومی جوزہ و پورو امنائی اتون سی پیک ڈٹ ئِ سرسہب جوڑ کینہ، سی پیک ننا قوم و بروک آ نسل آتا ڈٹ ئِ، زوت چین نا بڑزکو کہولی ڈل پاکستان نا دورہ ئِ کیک۔ داخیال آتا درشانی ئِ او پنچ شنبے آ داڑے مشترکہ کمکار کمیٹی (جے سی سی ) نا جاچ دیوان آن پد میڈیا تون ہیت وگپ کرسا کرے۔ بنجائی وزیر احسن اقبال پارے کہ غٹ صوبہ غاتے انڈسٹریل زون تا اڈتننگ کن جاگہ نا تعین کن پاننگانے۔ اوپارے کہ سوشل میڈیا نا کمک اٹ سی پیک نا بابت بے بنداو ہیت آتے تالان کننگا و غلط فہمی ودی کننگ نا کوشست کرسا کننگا ولے سی پیک نا برخلاف چمب کروک آک ہرفورم آ بے سہب مریرہ۔ بنجائی وزیر پارے کہ چین نا سروک پاکستان اٹی صنعت آتا شونداری خوائک۔ سی پیک ڈٹ آتیا پاکستان نا صنعت آک ترندی اٹ کاریم کننگ ئُ۔ اوپارے کہ 2018ءٹی ننا معیشت نا پیداوار 6درسد مریک۔ اوپارے کہ 2018ءاسکان قومی گریڈ اٹی 11ہزار میگاواٹ بجلی سسٹم اٹی اوار مریک ہراڑآن توانائی نا تنکی چٹک۔ اوپارے کہ سی پیک نا رداٹ چین پاکستان اٹی صنعت خلنگ ئِ ، چین اٹی لیبر کبین ئِ و پیداوار و خڑچ آتیٹی ودکی مسنے۔ پاکستان اٹی صنعت خلسا چین تینا پیداواری خڑچ آتے کم کیک۔ اوپارے کہ پاکستان اٹی چین نا اخس کہ ڈٹ چلینگ انگ ئُ اوفتیٹی نیمہ غان زیات پاکستانی انجینئر و مزور کاریم کننگ ئُ۔ تینا ڈٹ آتے تخوک آ وخت اٹی پورو کرفنگ کن چینی انجینئرو ورکرآک دے و نن کاریم اٹی اختہ ئُ۔ اوپارے کہ اقتصادی راہداری ڈٹ مسہ سال مست بیرہ کاغد اسے نا ٹکر ئس ہراڑآ اینو عملدرآمد مننگ ئِ، اگہ نن 2030ءاسکان دانا جتا ہدف آتے دوئی کرین تو پاکستان داڈیہہ نا تہٹی کلیدی اہمیت نا حامل ملک اس جوڑ مریک۔ اوپارے کہ سی پیک پاکستان ئِ تینا نت تیا سلیفینے، پاکستان اٹی درملکی زرکاری ٹی ترندی اٹ ودکی مننگ ئِ ۔ اوپارے کہ اقتصادی راہداری ڈٹ مچ آ ڈیہہ کن گیم چینجر اسے۔ داوخت آ وزیراعلیٰ خیبر پختونخوا پرویز خٹک پارے کہ سی پیک ڈٹ آ چین نا دورہ کن بنجائی حکومت نا منت وار ئِ۔ اوپارے کہ مارچ اٹی بیجنگ نا دورہ ئِ کرسا ڈٹ آتا بابت کاریم ئِ پورو کینہ۔
