دھرنہ و گھیڑ کننگ آن ملک مون آ ہنپک، عمران خان جندی فائدہ کن پاکستان نا معیشت ئِ برباد کننگ آ سلوک ئِ ، اونا وزیر اعظم جوڑ مننگ نا تغ پورو مفک
اسلام آباد۔ 18جنوری (اے پی پی) وزیر ریلوے خواجہ سعد رفیق پارینے کہ عمران خان ادارہ غاتا زور شاغنگ نا کوشست ئِ کیک او مقدمہ نا بابت سنجیدہ اف۔ سپریم کورٹ نا پیشن میڈیا تون ہیت وگپ کرسا اوپارے کہ عمران خان ، شیخ رشید و سراج الحق مقدمہ غاتا بابت سنجیدہ مسرہ تو میڈیا غا بیان آتیان بیدس عدالت اٹی دادائر مقدمہ غاتاتوجوہ تسرہ۔ اوپارے کہ پی ٹی آئی کیس انا بابت ہراوکیل آتے گچین کرینے۔ داڑآن صفا مریک کہ او مقدمہ غاتیٹی سنجیدہ اف۔ ورنہ پاکستان اٹی وکیل نا زی آ وکیل ساڑی ارے، عمران خان کیس ئِ سیاسی و السی مقدمہ ہلنگ ئِ و ہردے میڈیا نا مون آ غیر سنجیدہ زبان ئِ کاریم اٹ اتیک ہراٹی دوبہ و دروغ تڑنگک۔ اوپارے کہ عمران خان تینا سیاست نا اولین دور اٹی الس ئِ مشورہ تسوسس کہ او تینا پیسہ غاتے ہنڈی نا کمک اٹ پیش آ گدریفسا کیر ہراڑآخلقت حیران مس کہ عمران خان امرو بندغ اسے ہرا الس ئِ غیر کانودی گام گیج نا مشورہ تننگ ئِ۔ خواجہ سعد رفیق پارے کہ دا دور اٹی اودابیان ئِ ہم تس کہ اگہ او برسراقتدار بریک تو پولیس اٹی ہم تھانیدار تا گچین کاری نا عمل نا بنائِ کیک ۔ اوپارے کہ اینو عدالت اٹی عمران خان پارے کہ ترسیلات زر آ خراج ئِ لاگو کننگے تانکہ ہراپیسہ غاتے نواز شریف صاحب نا مار اودے گدریفیسوس اوڑآ خراج نا عدم ادائیگی نا دوبہ ئِ خلنگ مرے۔ اوپارے کہ عمران خان بیرہ جندی فائدہ کن پاکستان نا معیشت ئِ برباد کننگ آ سلوک ئِ۔ اوپارے کہ بایدے عمران خان ئِ مرے کہ او ادارہ و اعدالت اٹی سیاست کننگ آن بیدس الس اٹی ہنسا سیاست کے۔ عمران خان تون دوبہ غاتیان بیدس ہچ اس اف ، الس سرپند مسنے کہ او بیرہ سیاست کننگ ئِ۔ عمران خان ئِ نواز شریف فوبیا مسنے اودے نن نا خاچنگ اٹی ہم نواز شریف نظربریک۔ عمران خان نا پارٹی نا ہراصوبہ ٹی حکومت ئِ او ہموجاگہ نا الس نا جوانی کن ہچ ئُ کاریم اس کننگ پننگ اٹی ئِ ، او بیرہ دھرنہ ، اسلام آباد ئِ گھیڑ کننگ ، دارالحکومت نا رہینگوک آتا زند ئِ مفلوج کننگ و عدالت آتے دباﺅ ٹی اتنگ نا کوشست آتے کیک ۔ اوپارے کہ عمران خان پارلیمنٹ و الیکشن کمیشن تون اوار کیہی ادارہ غاتے گھیڑ کرینے۔ اودے بایدے معلوم مرے کہ دھرنہ و گھیڑ کننگ آن ملک مون آ ہنپک ۔ وزیر ریلوے پارے کہ سی پیک آ کاریم ترندی اٹ برجاہ ئِ وخت اس کہ عمران خان الس ئِ گمراہ کننگ ئِ۔ اوچین نا حکومت ئِ ہم کنفیوز کننگ نا کوشست کرے و او سرسہب متو۔ اوپارے کہ 2018ءنا گچین کاریک بننگ والا ئُ و الس اسہ وار ولدا نواز شریف ئِ وونٹ ترسا ملک انا وزیراعظم جوڑ کیرہ۔ درملکی زرکاری بریک، پاکستان شونداری کیک و عمران خان نا وزیراعظم جوڑ مننگ نا تغ پورو مفک۔ اوپارے کہ سراج الحق و مچ آ خیبر پختونخوا نا حکومت تینا کارکڑد و پُلنگ آ ہیت ہم کپسہ و نہ ہی استیفہ ایترہ بیرہ خلقت آن استیفہ خوارہ۔ سعد رفیق پارے کہ عمران خان ئِ بایدے مرے کہ ہراصوبہ ٹی حکومت کننگ ئِ ہموڑے احتساب کے۔ اوخیبر پختونخوا ٹی احتساب کن جوڑ کروک آ تینا ہی جوڑ کروک کانود نا دوتے کاٹ کرے و جنرل (ر) حامد ئِ عہدہ غان برطرف کرے۔ سعد رفیق شیخ رشید نا بابت پارے کہ اگہ مسلم لیگ (ن) اودے گچین کاری تیٹی لفٹ کرفیکہ تو اینو دا نن تون سلیسکہ ، ہراڑتون اسٹ اس ہم ہیت کپک او پی ٹی آئی ٹی اوار مریک۔ اوپارے کہ نن شفاف سیاست آ یخین تخنہ۔ وزیر ریلوے پارے کہ نن عدالت آتیان استثنیٰ خواتون، تینے عدالت نا مون آ پیش کرینن۔ انشاءاللہ دروغ قوم انا مون آ بریک و لیڈرآتا قسمت نا فیصلہ الس نا عدالت اٹی ہی مریک۔ سیاست دان تمے یا سلے الس نا ہی عدالت اٹی کائک۔
