اسلام آباد۔ 17جنوری (اے پی پی) پاکستان مسلم لیگ (ن) نا راہشون سینیٹر نہال ہاشمی پارینے کہ قوم عمران خان و سراج الحق آن ہریفنگ ئِ کہ خیبر پختونخواٹی لوٹ مار مننگ ئِ انصاف ئِ لتاڑنگ انگ ئِ داڑآ نم ہراتم بش مریرے۔ سپریم کورٹ نا پیشن میڈیا تون ہیت وگپ کرسا اوپارے کہ جماعت اسلامی نا امیر سراج الحق ئِ سپریم کورٹ اٹی خنسا اودے بھاز تعجب مریک و سجفک کہ او بایدے پشاور ہائی کورٹ اٹی مروسس و بایدے خیبر پختونخواٹی کرپشن نا برخلاف توار بڑز کروسس۔ نہال ہاشمی پارے کہ ہراتم بینک آف خیبر نا ایم ڈی چیہانٹ چیہانٹ اٹ دہائی ترسا کرے کہ اوڑتون بیدادی مننگ ئِ ولے ہمووخت آ سراج الحق چپ مس و داسہ پائک کہ اونا پارٹی ٹی کرپشن اف۔ اوپارے کہ سراج الحق نا پارٹی نا راہشون و وزیر خزانہ بینک آف خیبر آ ناجائز دباﺅ شاغسا کرے و خیبر بینک ئِ پلسا کریر کاش سراج الحق ہمووخت آ ہم بش مروسس و پشاور ہائی کورٹ اٹی ہنوسس و دامقدمہ ئِ ہلسا سپریم کورٹ اٹی بروسس و پاروسس کہ بھاز بیدادی مننگ ئِ۔ سینیٹر نہال ہاشمی سراج الحق ئِ مخاطب کرسا پارے کہ نے بایدے مروسس کہ نی داوخت عمران خان تون سلنگ آن بیدس جنرل حامد تون سلوسس۔ مسلم لیگ (ن) نا راہشون پارے کہ اودے داسمجھ بفک کہ ہراڑے دا حکمران ئِ ہموڑے اونا زبان بند ئِ و ہراڑے اپوزیشن اٹی ئِ ہموڑے چیہانٹ خلنگ ئِ۔
