کوئٹہ۔ 18جنوری (اے پی پی) پاکستان ورکرز کنفیڈریشن بلوچستان ریجن نا اہم ئُ دیوان اس عبدالسلام بلوچ نا کماشی ٹی اڈ ہلک۔ دیوان اٹی صوبائی جنرل سیکرٹری علی بخش جمالی ریجن نا کیہی ضلع غاتا دورہ غاتا بابت کابینہ ئِ مزور آتا ویل آتیان معلومدار کرے۔ ساڑی مروک آک دا ضلع غاتیٹی سرسہب جلسہ غاتا اڈتننگ آ مبارکباد پیش کرے۔ دیوان اٹی مسکوہی لیبر ڈائریکٹر نا برخلاف محکمہ خواری و افرادی واک انا سیکرٹری نا کنڈآن انکوائری کمیٹی نا معاملہ ہم شرہ ٹی اتنگا۔ ساڑی مروک آک پاریر کہ مزور آتا حق انا دوئی و شرحالی کن لیبر ڈائریکٹر نا بھاز بھلو کڑد اس مریک، کنفیڈریشن نا صوبائی صدر دیوان آن تران کرسا پارے کہ وزیراعلیٰ بلوچستان نواب ثناءاللہ خان زہری و صوبائی وزیر محنت و افرادی قوت میر سرفراز چاکر ڈومکی تون اوڑدہی کرسا مزور آتا ویل و مسکوہی لیبر ڈائریکٹر نا کارستانی تیان معلومدار کننگک ہراڑکن اسہ ہفتہ اسکان انکوائری کمیٹی نا رپورٹ نا انتظار ئِ کننگک اوکان پد دا بابت بروک آ دیوان اٹی لائحہ عمل اس طے کینہ و ریجن نا ایلو ضلع غاتا دورہ ئِ کرسا مزور راہشون آتون صلابت کرسا مارچ انا تواٹی کنفیڈریشن نا چارٹرآف ڈیمانڈ نا منظوری مفننگ آ برانزی شیڈول اس جاری کننگک و داٹی کنفیڈریشن نا ضلعی نمائندہ غاتے ہم پندار کننگک۔
