مدینہ نا ریاست اٹی تعلیم و شیفکو و نزور تپہ غاتا شرحالی آ خصوصی چکار کننگا، ایوان وزیراعظم ءِ یونیورسٹی ٹی بدلیفنگ نا مسخت ہم تعلیم نا اہمیت ءِ تالان کننگ و حکمران تپہ و الس نا نیام اٹ فاصلہ ءِ کم کننگ نا ءِ
اسلام آباد۔ 21 دسمبر (اے پی پی) وزیراعظم عمران خان پارینے کہ مدینہ نا ریاست اٹی تعلیم و شیفکو و نزور تپہ غاتا شرحالی آ خصوصی چکار کننگا، ریاست مدینہ نا ماڈل نا پیروی ءِ کرسا ساڑی آ حکومت انسانی وسیلہ غاتا شونداری و راج آن نیزگاری نا چٹفنگ کن تعلیم خاص کر بڑزکو تعلیم نا بشخ آتے اولی اہمیت تننگ ءِ، ایوان وزیراعظم ءِ یونیورسٹی ٹی بدلیفنگ نا مسخت ہم تعلیم نا اہمیت ءِ تالان کننگ و حکمران تپہ و الس نا نیام اٹ فاصلہ ءِ کم کننگ نا ءِ، معاشی حالیت زوت گچین مریک، احتساب مہم اٹی دوئی مروک آ پیسہ غاتے تعلیم نا بشخ آ خڑچ کننگک۔ اوداہیت ءِ جمعہ نادے داڑے ایوان وزیراعظم اٹی اسلام آباد نیشنل یونیورسٹی نا بنائی کانفرنس اٹی ’’پاکستان کن مون آ بروک آ چیلنجز و وارخواہی‘‘ نا سرحال آ تران کرسا پارے۔ داڑے داہیت ذکر انا قابل ءِ کہ وزیراعظم عمران خان اولیکو دے ہی وزیراعظم ہاؤس ءِ پوسکن ءُ یونیورسٹی اس جوڑ کننگ نا پڑو ءِ کریسس و دا دود دا چرجوئی ٹی اولی تدریسی سرجزءِ۔ وزیراعظم پارے کہ چنکی آن ہی بھلا بھلا گورنر ہاؤس و حکمران تپہ غاتا بھلا شاہانہ اُراتے خنسا بسنوٹ ولے برطانیہ ٹی حکمران تا اُراتے خناٹ کنا ذہن اٹی بنداوی ءُ بدلی اس بس۔ اوپارے کہ آجوئی ملنگ آن پد ملک اٹی تعلیمی بشخ آ ہچ ءُ چکار اس کننگتنے و اودے بھاز بے وڑ گوجالنگانے۔ جان جوڑی نا بشخ ءِ ہم گوجالنگاو چناتا غذائی کاختی نا سوب آن اوفتا مناسب نشوونما مفننگ بھاز بھلو ویل اسے۔ ملک اٹی 43 درسد چناسٹنٹڈ گروتھ نا گواچی ءُ ہرابھاز است ہسونی اسے۔ اوپارے کہ ملک اٹی الس نا خراج نا پیسہ غاتے حکمرانک تینا شاہانہ زند انا طرز اکن کاریم اٹ ایسور۔ اوپارے کہ پاکستان تحریک انصاف نا حکومت کفایت شعاری و سادگی ءِ مون آ دننگ ءِ و دارداٹ ورناتے ٹی خصوصی وڑاٹ شعور بیدار کننگک تانکہ او خراج نا پیسہ غاتا غلط کاریم اٹ اتنگ نا برخلاف توار چست کیر۔ اوپارے کہ علامہ اقبال ہراتم اسلامی فلاحی ریاست نا جوڑ کننگ نا ہیت ءِ کریکہ تو اونا پیش نظر اسہ ہی ماڈل اس ئس و او مدینہ نا ریاست نا ماڈل ئس۔ ساڑی حکومت ہم ہمو ریاست مدینہ نا ماڈل ءِ مون آ تخانے تانکہ پاکستان ءِ جوان وڑاٹ اسہ فلاحی اسلامی ریاست اسے ٹی بدل کننگ مرے۔ وزیراعظم پارے کہ مدینہ نا ریاست اٹی حکمرانک الس نا پیسہ غاتے تینا جند آ خڑچ کتوس۔ اوپارے کہ تعلیم آن بیدس ملک مون آ ہِننگ کپک ۔ دارداٹ علم آ مبنی معیشت خصوصی اہمیت تخک۔ انسانی وسیلہ غاتے شون ترسا راج مون آ ہِننگ کیک و تعلیم نا کمک اٹ ہی انسانی وسیلہ غاتے شون تننگ مریک۔ داڑتون اوار اوار راج آن نیزگاری ءِ چٹفنگ ہم بھاز المی ءِ۔ داچرجوئی ٹی اوچین نا مثال ءِ پیش کرے ہراڑے 77 کروڑ الس ءِ نیزگاری آن کشنگا۔ مدینہ نا ریاست اٹی شیفکو تپہ ءِ بڑز اہرفنگا۔ اوپارے کہ ایوان وزیراعظم ءِ یونیورسٹی اس جوڑ کننگ نا پس پردہ دامسخت ئس کہ ننے تینا سمت ءِ سہی کروئی ءِ و خلقت ءِ دا کلہو ءِ تروئی ئس کہ ملک انا کبین انگا و گچین انگا جاگہ ءِ درسگاہ اسے ٹی بدل کننگک تانکہ تعلیم نا اہمیت تالان مننگ کے۔ اوپارے کہ ریاست مدینہ ٹی تعلیم نا اہمیت آ بھاز زور شاغنگانے و جنگ بدر نا وخت آ دزگیر مروک آ بندی تیان پیسہ نا بدلہ یلہ کننگ نا جاگہ غا اوفتے تون پاننگاکہ بندی تے ٹی ساڑی خوانوک آ بندغ 10 چناتے تعلیم ترسا یلہ مننگ کیرہ۔ اوپارے کہ داڑآن واضح مریک کہ ریاست مدینہ ٹی تعلیم ءِ اخس اہمیت تننگاکہ۔ اوپارے کہ ننا احتساب مہم سرسہبی اٹ برجاءِ و بھلا بھلا دُز آتیان ملوک آ پیسہ غاتے تعلیم آ خڑچ کننگک ۔
