اسلام آباد۔03مئی (اے پی پی) صدر مملکت ممنون حسین پارینے کہ داسا وخت بسنے کہ مسلم امہ دہشت گردی تون مون تننگ کن اسیجائی حکمت عملی اس اختیار کیر انتئے کہ دہشت گرد آک تینا گمراہ کن نظریہ غاتا سوب آن اسلام ئِ بدنام کننگ ئُ۔ صدر مملکت داہیتئِ قطر انا سفیر سقر بن مبارک المنصوری تون ہیت و گپ کرسا پارے ہراایوان صدر اٹی سے شنبے آ اوڑتون اوڑدہی کرے۔ صدر مملکت پارے کہ اسلام امن نا دین اسے ہرا انسانی جان نا حرمت آ یخین تخک و بے گناہ بندغ آتاخون نا موکل تفک۔ اوپارے کہ گمراہ عنصر آک خونریزی کرسا اسلام ئِ بدنام کرینو ہراڑتون مون تننگ کن اسلامی ملک آتے اواری اٹ کاریم کروئی مرے۔ صدر مملکت ہڑتوم آ ملک آتا نیام اٹ واپار اٹی ودکی آ زور شاغا و پاکستان آن ہنر مند و غیر ہنر مند کارندہ غاتا درآمد نا فیصلہ غا حکومت قطر نا فیصلہ نا منت واری ئِ ادا کرے۔ او2020ءٹی فیفا ورلڈ کپ انا میزبانی آ قطری سفیر ئِ موارکبادی تس و پارے کہ اوڑآن جہانی برادری ٹی قطر انا وقار پین بڑز مریک۔ او پارے کہ فیفاورلڈ کپ انا اڈتننگ کن بھلو کچ اسے ٹی افرادی قوت نا گرج تمک ہراڑکن پاکستان قطر اتون کمک کیک۔ ا
