بیجنگ۔ 14نومبر (اے پی پی) چین وپاکستان نا مسکوہی سفارتکار آک پارینو کہ وزیراعظم عمران خان نا ساڑی آ چین نا دورہ غان ہڑتوم آ ملک آتا نیام اٹ دوستانہ تعلقداری پوسکن آ بڑزی تسکان سرمریرہ و داڑآن پاک چین سنگتی و کمکاری نا اسہ پوسکن ءُ دور اس بناکرینے۔ داہیت ءِ ہڑتوم آ ملک آتا مسکوہی سفار ت کار و چاہندارآک ’’اے پی پی‘‘تون ہیت وگپ کرسا پاریر۔ عسکری بینک انا چیف نمائندہ حسیب الرحمان نا کنڈآن اڈ تروک آ بیابخیری ٹی مسکوہی سفارت کار آک پاریر کہ وزیراعظم عمران خان نا چین نا دورہ اسہ اہم ءُ سرسہبی اسے۔ ہڑتوم آ ملک آتا الس دانا ستاءِ کرینو و دادورہ نا خیرمقدم ءِ کرینو۔ چائنہ انسٹیٹیوٹ آف انٹرنیشنل سٹریٹجک سٹڈیز نا سینئر سلاہکار سفیر لوشولین پارے کہ وزیراعظم عمران و چین نا صدر شی جن پنگ اقتصادی راہداری ڈٹ آتیا اسہ وڑنا خیال آتا درشانیءِ کرینو و ہڑتوم آ راہشونک داڈٹ ءِ ہڑتوم آ ملک آتا آخبت کن اہم گوندار۔ اوپارے کہ الس نا نیام اٹ رابطہ پاک چین سنگتی و کمکاری کن اہم ءِ۔ ساڑی آ دورہ ٹی ہڑتوم آ ملک آتا بڑزکو کمامدارآتانیام اٹ اوڑدہی مس و اہم ہڑتوم آ کنڈآتا است خواہی نا معاملہ و علاقائی و جہانی حالیت آتا جاچ ءِ ہلنگا۔ پاکستان نا مسکوہی سفیر کرامت اللہ غوری پارے کہ وزیراعظم عمران خان نا چین نا دورہ ستاکڑزک۔ اوپاکستان ءِ مون تروک اقتصادی مشکل آتا رداٹ سلابت کن دادورہ ءِ کرے ہرا سرسہب مس۔ اردو زبان نا پنی چینی شاعر پروفیسر ژانگ شی جوان ہرااردو ٹی تینا پن ءِ گچین بڑز تخانے، پاکستان و چین نا الس نا نیام اٹ دودوربیدگی رابطہ و تعلقداری تے مون آ دننگ نا گرج آ زور شاغا۔ اوپارے کہ ہڑتوم آ ملک آتے دودوربیدگ و ادب نا بشخ اٹی کمکاری ءِ مون آ بایدے دروئی مرے۔ پروفیسر ژانگ اردوزبان ناکیہی کتاب آتا چینی ٹی ترجمہ ءِ کرے۔
