صدر مملکت عارف علوی و ترک صدر رجب طیب اردوان نا اوڑدہی، تین پہ تینی کمکاری ءِ پین مون آ دننگ آ امنا

استنبول۔ 30اکتوبر (اے پی پی) صدر مملکت عارف علوی و ترک صدر رجب طیب اردوان غٹ بشخ آتے ٹی ہڑتوم آ کنڈآتا تعلقداری تے پین کڑمب کننگ کن ہڑتوم آ برادر ملک آتا نیام اٹ تین پہ تینی کمکاری ءِ پین مون آدننگ آ امنا کرینو۔ داامنائی سے شنبے نادے داڑے ہڑتوم آ راہشون تا ون ٹو ون اوڑدہی ٹی مس۔ صدر ڈاکٹر عارف علوی ترک صدر رجب طیب اردوان نا سلہ غا استنبول نا گرینڈ انٹرنیشنل بالی پٹ انا بناءِ کننگ کن ترکی نا دورہ غاٹی ءِ۔ داوخت آترک صدر ڈاکٹر عارف علوی ءِ صدارتی منصب ءِ سنبھالنگ آ مبارکبادی تس۔ اواومیت ظاہر کرے کہ پاکستان نا پوسکن آ سرکڑدہ نا رداٹ ہڑتوم آ برادر ملک آتا نیام اٹ تین پہ تینی تعلقداری پین زیات مریک۔ صدر عارف علوی ہڑتوم آ کنڈآتا آزادانہ واپاری معاہدہ ءِ زوت طے کننگ و ہڑتوم آ کنڈآتا واپار اٹی ودکی آ زور شاغا۔ اوپاکستان اٹی ودوک آ ترک زرکاری آ است جمی نا درشانی ءِ کرسا اومیت ظاہر کرے کہ ترک زرکارآک پاکستان اٹی چندی زرکاری وارخواہی تیان پین فائدہ ہرفرہ۔ اوترک ہم منصب نا جم و جوش اٹ بخیر کننگ و مہمان نوازی آ منت واری ءِ ہرفے۔ اوترک صدر ءِ پاکستان نا دورہ نا سلہ ہم خلک۔ صدر ڈاکٹر عارف علوی ترکی نا 95می یوم جمہوریہ نا وخت آ دورہ کروک آ سروک مملکت و حکومت نا شرف اٹی ترکی نا صدر نا کنڈآن تروک آ بیابخیری ٹی ہم شرکت کرے۔