اسلام آباد۔ 26اکتوبر (اے پی پی) اسپیکر قومی اسمبلی اسد قیصر تون وزیر خارجہ شاہ محمود قریشی اوڑدہی کرے۔ اوڑدہی ٹی جم اٹنگا ملکی سیاسی و اقتصادی حالیت و تین پہ تینی است خواہی نا ایلو معاملہ غاتیا خیال آتا درشانی ءِ کننگا۔ جمعہ نا دے مروک آ اوڑدہی ٹی اسپیکر قومی اسمبلی ساڑی آ حکومت نا سرسہب خارجہ پالیسی تا ستاءِ کرے۔ اوداوخت آ پارے کہ شاہ محمود قریشی بے کچ چنکو وخت اسے ٹی پاکستان نا موقف ءِ بے کچ گچین وڑاٹ دنیا ٹی تالان کرے۔ پاکستان ءِ ہرا چیلنج آتا مون تروکی ءِ اوفتے تون مون تننگ کن قومی یکجہتی تون اوار اوار سوگو خارجہ پالیسی ہم المی ءِ، اسپیکر قومی اسمبلی پارے کہ سعودی عرب آن 6ارب روپئی نا ریلیف پیکج ستاء کڑزک دانا ملکی معیشت آ گچین زہم تمک ، اسپیکر وزیر خارجہ ءِ اقوام متحدہ نا پلیٹ فارم آ پاکستان نا موقف ءِ شاندار وڑاٹ پیش کننگ آ مبارکبادی تس۔ وزیر خارجہ شاہ محمود قریشی صفتی ہیت آتیا اسپیکر نا منت واری ءِ ہرفے و ایوان نا کارروائی ءِ جوان وڑاٹ چلیفنگ آ اونا کڑد انا ستاءِ کرے ۔ وزیر خارجہ شاہ محمود قریشی پارے کہ پاکستان اسہ وت واجہ ءُ ملک اسے و تینا فیصلہ ءِ بیدس کس اسے نا زور آن ملکی فائدہ ءِ مون آ تخسا کیک۔ اوپارے کہ ہمسایہ ملک آتون گچین تعلقداری، کشمیر نا ویل انا پرامن ایسری و دنیا ٹی پاکستان نا دروشم ءِ تالان کننگ ننا خارجہ پالیسی نا اہم ءُ جزو اسے۔ وزیر خارجہ پارے کہ مسلم ملک آتا نیام اٹ خوشگوار تعلقداری تے سوگو کننگ و غلط فہمی تے مر کننگ پاکستان نا خارجہ پالیسی نا بشخ ءِ۔ سعودی عرب و یمن نا نیام اٹ ثالثی ہم دا چرجوئی نا اسہ کڑی اسے۔
