پاکستان کمک ءَ چہ تجارت ءُ سرمایہ کاری ءِ نیمگ ءَ رھادگ بوھگ ءَ اِنت، وزیر ءِ ھزانگ محمد اورنگزیب ءِ چینل نیوز ایشیا ءَ گوں گپ ءُ تران

بنکاک۔15اکتوبر  (اے پی پی): وفاقی وزیر خزانہ سینیٹر محمد اورنگزیب ءَ گوشت کہ پاکستان کمک آنی سر ءَ انحصار ءَ چہ تجارت ءُ سرمایہ کاری ءِ نیمگ ءَ رھادگ بوھگ ءَ اِنت ءُ خلیج ءِ ملک، امریکہ، چین ءُ ایندگر دیریں شریکیں ملک آنی گوما اقتصادی سیادی ءَ را گیش مھکم کنگ ءِ سر ءَ دلگوشی دیگ ءَ اِنت۔ رواں مالی سال ءِ تہ ءَ زرّ ءِ دیم دیگ ءِ کساس 44ارب ڈالر ءَ سر بوھگ ءِ امکان اِنت۔ ورلڈ بینک ءُ انٹرنیشنل مانیٹری فنڈ ءِ سالانہ دیوان آنی موہ ءَ چینل نیوز ایشیا ءَ گوں تران کنان ءَ وزیر ءِ ھزانگ ءَ گوشت کہ پاکستان مشکلیں وھد ءَ وتی شریک آنی کمک ءُ برجاھیں کمک ءَ را ارزشت دنت۔ کمک ءَ چہ تجارت ءُ سرمایہ کاری ءِ نیمگ ءَ رھادگ بوھگ پاکستان ءِ واستہ یک ھاسیں رھشونی یے ۔ حکومت خلیج ءِ ملکاں ھوار درستیں دو نیمگی شریک آنی گوما تجارتی ءُ اقتصادی سیادی آناں گیش مھکم کنگ لوٹ ایت۔ آئی ءَ گوشت کہ گوستگیں مالی سال ءِ ساھت ءَ پاکستان ءَ 41 ارب 6 ارب ڈالر ءِ زرّ دیم رستگ وھدیکہ رواں مالی سال ءَ اے زرّ 44 ارب ڈالر ءَ سر بوھگ ءِ گمان اِنت۔ خلیج ءِ ملک آنی گوما پاکستان ءِ دیریں سیادی تجارت ءُ زرّ ءِ روان دیگ ءِ رد ءَ ھم المی اَنت۔ وزیر خزانہ ءَ گوشت کہ پاکستان یک دومی ءِ گوما سیادی ءَ را متبادل ءِ رنگ ءَ گندگ ءِ بدل ءَ یکیں وھد ءَ چین ءُ امریکہ دوئیں ملک آنی گوما اقتصادی سیادی آناں دیم ءَ برگ ءِ سر ءَ دلگوشی دیگ ءَ اِنت۔ چین پاکستان ءِ دیریں شریک اِنت ءُ چین ءُ پاکستان اقتصادی راہداری بیلٹ اینڈ روڈ ءِ گامگیج ءِ یک ھاسیں بہرے بوتگ۔ آئی ءَ گوشت کہ سی پیک ءِ اولی بھر ءَ سڑک، بندرگاہ ءُ بجلی گس ھواریں بنیاتی ڈھانچگ ءِ جوڑ کنگ ءِ سر ءَ دلگوشی دیگ بوتگ وھدیکہ دومی بھر ءَ استیں بنیاتی ڈھانچگ ءَ چہ اقتصادی سیت ءِ کٹگ ءُ کاروباری موہ آناں گیش کنگ ءِ سر ءَ دلگوشی دیگ بوتگ۔ محمد اورنگزیب ءَ گوشت کہ سی پیک ءِ دومی بھر ءَ کاروباری ادارگ آنی نیام ءَ کمک ءُ یکجائی سرمایہ کاری منصوبگ آناں دیم ءَ برگ بوھگ ءَ انت۔ چین ءِ گوما لھتیں یکجائی منصوبگ آنی تہ ءَ برآمدات ءِ واستہ ھم پروڈکٹ جوڑ کنگ بوھگ ءَ اِنت کہ ایشی ءَ چہ پاکستان ءِ برآمداتی کار آناں گیش کنگ ءِ موہ پیداک بوت کنت۔ آئی ءَ گوشت کہ پاکستان امریکا ءِ گوما ھم اقتصادی سیادی ءَ را گیش کنگ لوٹ ایت۔ پاکستانی سروکی ءِ امریکی انتظامیہ ءِ گوما جوانیں سیادی است انت، ایشی ءَ چہ اقتصادی کمک ءَ را دیم ءَ برگ ءِ واستہ کارمرد کنگ بیت۔ وزیر خزانہ ءَ گوشت کہ جہانی تجارت ءِ گیش بوھوکیں ٹک ءُ ٹک ءِ سبب ءَ جتاجتائیں دمگ آنی نیام ءَ کمک ءِ ارزشت گیش بوھگ ءَ انت۔ پاکستان خلیج ءِ ملک، میاں اوستمانی ملک ءُ آسیان ءِ ملک آنی گوما کمک ءِ واستہ نوکیں موہ آنی شوھازگ ءَ انت۔ ملائیشیا ءِ بازیں تر ءُ تاب ءُ ملائیشیا ءُ انڈونیشیا ءِ سروکی ءِ پاکستان ءِ تر ءُ تاب ءَ چہ دمگی سیادی ءُ کمک ءَ را گیشی بوتگ۔ تھائی لینڈ ءِ نندگ ءِ وھد ءَ تھائی لینڈ ءِ وزیر ءِ ھزانگ ءِ گوما گند ءُ نند ءَ چہ دمگی اقتصادی کمک ءَ را گیش کنگ ءِ موہ ھم رس ایت۔ محمد اورنگزیب ءَ گوشت کہ استیں جھان ءِ جاور ھال آنی تہ ءَ مشکل آنی گوما نوکیں تجارتی موہ ھم دیم ءَ آیگ ءَ اَنت، ایشی ءَ چہ پائدگ چست کنگ ءِ واستہ پاکستان جتا جتائیں ملک ءُ دمگ آنی گوما اقتصادی کمک ءَ را گیش کنگ لوٹ ایت۔ آئی ءَ گوشت کہ امریکا پاکستان ءِ مستریں تجارتی شریک انت، وھدیکہ یورپی یونین دومی نمبر ءَ انت۔ پاکستان ایندگر دمگی تجارتی گل آنی گوما سیادی ءَ را گیش کنگ ءَ چہ دو نیمگی تجارت ءِ مزنیں گنجائش ءَ چہ پائدگ چست کنگ لوٹ ایت۔ وزیر خزانہ ءَ گوشت کہ دمگی مارکیٹ آنی گوما تجارت ءِ تہ ءَ گیشی ءُ شریکداری ءِ تہ ءَ تنوع ءِ وسیلگ ءَ چہ جھان ءِ تجارتی بے وسی ءِ آسر آناں گر ءُ چیل بوھگ ءَ کمک رس ایت۔ پاکستان انوگیں جھان ءِ جاوراں نوکیں تجارتی موہاں چہ پائدگ چست کنان ءَ وتی اقتصادی سیادی ءَ گیش مھکم ءُ گیش کنگ ءِ جھد ءَ اِنت۔\932