گلگت بلتستان ءَ ھم ملک ءِ دگہ استانانی وڑ ءَ سرجمیں ھک ءُ دیمروئی ءِ موہ بہ رس اَنت، احسن اقبال

اسلام آباد۔15اکتوبر  (اے پی پی): وفاقی وزیر منصوبہ بندی، دیمروئی ءُ ھاسیں گامگیج پروفیسر احسن اقبال ءَ گشتگ کہ گلگت بلتستان ءِ الس ءَ را بنیاتی قانونی حق، برابریں آسراتی ءُ وسیلگ ءَ چہ زبہر کنگ نہ بیت، گلگت بلتستان ءَ را ہم ملک ءِ وڑیں درستیں حق ءُ دگہ دیمروئی موہ رسگ لوٹیت۔ پنچ شمبے ءِ روچ ءَ سوشل نیٹ ورکنگ ویب سائٹ ایکس ءِ سر ءَ وتی بیان ءِ تہ ءَ آئی ءَ گوشت کہ مزن وزیر ءَ گلگت بلتستان ءِ اُلس ءِ جیڈھ آنی گیواری ءِ واستہ وتی نیمگ ءَ جوڑ کتگیں ھاسیں سٹیئرنگ کمیٹی ءِ سیمی دیوان ءِ سروکی کت، ایشی ءِ تہ ءَ ذیلی کمیٹی آنی سفارشات آنی سرجمیں رنگ ءَ چار ءُ تپاسی کنگ بوت۔ احسن اقبال ءَ گوشت کہ یک سالے پیسر آئی ءَ پاکستان ءِ مزن وزیر ءَ را نبشتھی رنگ ءَ سفارش کتگ ات کہ گلگت بلتستان ءَ را نیشنل فنانس کمیشن ءِ تہ ءَ باقاعدہ بھر دیگ بہ بیت تانکہ اقتصادی وت واجہی ءُ دمگ ءِ ترندیں دیمروئی ءِ راہ پچ کنگ بہ بیت۔ وفاقی وزیر ءَ گوشت کہ توامیں سٹیک ہولڈر آنی گوما سیاسی شور ءُ سلاھ ءَ را گڈی رنگ ءَ دیگ ءَ پد یک جامع ءُ ٹھوس ایکشن پلان ءِ زوت مزن وزیر کارگس ءَ پیش کنگ بوھگ ءَ انت۔ آئی ءَ اے جزم ءِ درشان کت کہ یک مھکم ءُ بااختیار گلگت بلتستان یک مھکمیں پاکستان ءِ ضامن اِنت۔