نیویارک۔ 26اکتوبر (اے پی پی) اقوام متحدہ ٹی پاکستان نا سفیر ملیحہ لودھی اقوام متحدہ نا سلامتی کونسل آ زور شاغانے کہ غٹ جھیڑہ غاتے خاص کر بھلو وخت اسے نا فلسطین و کشمیر کون آ جھیڑہ غاتا بنداوی سوب آتے مر کرسا اوفتے ایسر کننگے دا علاقہ غاتے ٹی زالبول ءِ درملکی کوزہ گرتا بے پناہ بیدادی و مصائب تون مون تروئی تمک انتئے کہ زالبول و مسن تے آسانی اٹ بیدادی نا نشانہ جوڑ کننگ مریک وخت اسکہ جھیڑہ ہی آ کیہی علاقہ غاتے ٹی جارحیت کروک آ فوج و ڈٹ ساز شاری تے خلیفنگ و دھڑکوتننگ نا جنگی حربہ نا وڑاٹ زالبول و چناتا استحصال ءِ کیرہ۔ سفیر ملیحہ لودھی 15باسکی سلامتی کونسل آن تران اٹی زور شاغا کہ زالبول کن چار بنداوی تمبہ غاتیا بریبری چکار کننگ ءِ ہر حال اٹ المی جوڑ کننگے و دا چار بنداوی تمبہ غاتے ٹی جھیڑہ ہی آ علاقہ غاتے ٹی زالبول نا رکھ ، زالبول نا مفادات آتا رکھ اکن امن و سلامتی نا ایجنڈا ءِ مون آ دننگ، انسانی حق انا قومی ادارہ غاتے سوگو کننگ اوار ءِ تانکہ زالبول و مسن تا حق انا پامالی نا مانیٹرنگ ءِ کننگ مرے۔ پاکستانی سفیر ملیحہ لودھی مصلحت آتے ٹی زالبول نا خصوصی مہارت نا ذکر ءِ کرسا پارے کہ زالبول ءِ اقوام متحدہ نا مشن تا سرکڑدہ ہی ءِ بایدے کروئی مرے وخت اس کہ امن اٹی اوفتا اہمیت نا رداٹ اوفتے صنفی رداٹ سوگو کننگے۔ داڑآن امن معاہدہ غاتے ٹی زالبول نا کڑد اٹی ودکی مریک وخت اس کہ داڑتون اوار اوار تعمیر نو و جھیڑہ چٹنگ آن پد انا مرحلہ غاتے ٹی ہم اوفتا کڑد ودک۔
