اقوام متحدہ ۔ 25اکتوبر (اے پی پی) روہنگیا مسلمان تے اقوام متحدہ نا کنڈآن میانمار نا شاری گوندنگ نا باوجود اوفتے تون اینو ہم است ہسون سلوک کننگ انگ ءِ۔ گدرینگوک آ سال میانمار نا فوجی تا رخائن اٹی کشت وخون و ولدا ہموکان لکھ آ روہنگیا مسلمان تا بے کچ بے سروسامانی نا حالیت اٹی بنگلہ دیش آ نقل مکانی، ثابت کیک جہانی برادر ی نا برانز نا باوجود ہموجاگہ نا سروک آنگ سان سوچی و فوجی جنرل آتیا ہچ ءُ اثر اس تمپننگ ءِ۔ اقوام متحدہ نا پولکار آتا پاننگ ءِ کہ میانمار اٹی ساڑی روہنگیا مسلمان تا نسل کشی داسہ ہم برجاءِ وخت اس کہ حکومت ہموڑے جمہوریت ءِ قائم کننگ اٹ ہچ ءُ چکار اس کننگ اٹی اف۔ امریکی خبررساں ایجنسی اے پی نا رپورٹ نا رداٹ اقوام متحدہ نا میانمار نا فیکٹ فائنڈنگ مشن نا سروک مارزو کی دارسمان نا پاننگ ئس کہ داسہ ہم ہزار آ روہنگیا بندغ بنگلہ دیش نا کنڈآ ہجرت کننگ ءُ و گدرینگوک آ سال انا بدھ مت کمیونٹی نا سرکڑدہ ہی ٹی روہنگیا بندغ آتا کشت وخون نا واقعہ غان پد ایلو بچوک آ کم وود 2.5 لکھ آن 4لکھ روہنگیا بندغ داسہ ہم بھاز پابندی تتون مون تننگ ءُ و ہموڑے دا نسل کشی داسہ ہم برجاءِ۔
