بنوں۔ 03مئی (اے پی پی) وزیراعظم محمد نواز شریف دوٹوک وڑاٹ پارینے کہ او داوڑنا سازش آتیان خلیپک ، الس ننے مینڈیٹ تس و مخالفین آتے شکست تس، الس نا خذمت و ملکی شون انا ایجنڈہ نا سرجزی اٹ پیروی ئِ برجاءتخنہ، اسہ پاولی سینا کرپشن ہم ثابت مرے تو نواز شریف اسہ منٹ اٹی تینا اُراغا کاہک، پوسکن آ پاکستان نا تغ انا تعبیر ملنگ ئِ۔ خیبر پختونخواٹی ننا حکومت اف ولے نن صوبہ نا الس نا خذمت کن داڑے بسونن۔ اوداخیال آتا درشانی ئِ سے شنبے آ داڑے عظیم الشان السی مچی آن تران کرسا کرے۔ وزیراعظم پارے کہ نن بلاجواز تنقید کروک آ مخالفین آتا پاننگ آ اُراغا اِنپنہ۔ اوپارے کہ 2013ءٹی ہراخلقت آک صوبہ خیبر پختونخواہ نا الس ئِ تغ نشان تسر اوفک داڑے ہچ اس کتوس۔ پنجاب ، سندھ، بلوچستان نا رہینگوک آک دننگا تغ تیا یخین کپس۔ اوپارے کہ داتغ نشان تروک آک داسا نم تون ملنگ کن بفسہ ۔ اول اوخلقت آک اِراسال اسکان دھاندلی آن پٹارہ و سپریم کورٹ اٹی معاملہ ہنا و سپریم کورٹ پارے کہ 2013ءنا گچین کاری تے ٹی دھاندلی متہ نے دا مخالفین تا بوز آ اسہ بھلو چپانٹ اسے ولے دھاندلی نا دوبہ خلوک آک معافی اسکان خواتوس۔ وزیراعظم پارے کہ اسہ وار ولدا اینو پوسکن ئُ دوبہ خلنگ انگ ئِ ، نن او بابت عدالتی کمیشن اسینا اڈتننگ نا پڑوئِ کرین انتئے کہ ننا دامن سفائِ ونن ہچ ئُ کرپشن اس کتنون۔ نواز شریف پارے کہ او پاکستان نا شون و الس نا شرحالی نا ایجنڈہ غا عمل کننگ ئِ۔ الس نا خذمت ئِ نن عمل اٹ ثابت کرینون۔ ڈی آئی خان آن انڈس ہائی وے نا جوڑ جاڑ و بحالی نا کاریم نا بنامسنے۔ چائنہ پاکستان اکنامک کوریڈور نا گچین زئم تمک، 2018ءٹی لوڈشیڈنگ چٹک۔ شاری تے ہڑزان بجلی و گیس ایتنہ۔ صنعت آتے 24گھنٹہ بجلی و گیس مست آن دو بننگ ئِ ہرا زوت الس ئِ ملنگ نا بناءمریک۔ اوپارے کہ ای پشاور شنکیاری مانسہرہ و خیبرپختونخوا نا ہراعلاقہ نا ہم دورہ ئِ کریٹ ہموڑے کنے متکن ئُ اسکول ، ہسپتال ، چوٹ چوٹ ئُ روڈ نظر بس ، 3سال اٹی کے پی کے نا حکومت ہچ ئُ پوسکن ئُ بنوں، لکی مروت، قطبی وزیرستان اس جوڑ کتو، اینو نن پوسکن ئُ بنوں اس جوڑ کننگ کن داڑے بسونن۔ اوپارے کہ اگہ خیبرپختونخواٹی ننا حکومت ہلوکہ جے یو آئی و مسلم لیگ (ن) نا سیٹ آک ئسر اگہ ننا حکومت جوڑ مسکہ تو داڑے خلقت آتے پوسکن ئُ خیبر پختونخواہ اس نظر بسہ۔ اوپارے کہ اینو نن پوسکن ئُ خیبر پختونخوا اس جوڑ کننگ نا بنائِ کرینن۔ اوپارے کہ نن غٹ آن مست 1991ءٹی موٹروے نا ہراتغ ئِ تسن اودے پورو کرین ، نن خیبرپختونخواہ ٹی بے شمار روڈ جوڑ کرینم، اینو نن بنوں ٹی اسہ پوسکن ئُ تاریخ اس رقم کننگ کن اِننگ اُن۔ بنجائی وزیر اکرم خان درانی نا منت وار اُٹ ہرا بھلو وخت اسیان پوسکن آ ڈٹ آتا بارواٹی کنتون ہیت و گپ کریکہ۔ اوپارے کہ نن نما محرومی تے مر کننگ کن داڑے بسونن، الس نا است و جان اٹ خذمت ئِ کننگ اُن، صرف بجلی نا ہیت ئِ کپنہ روڈ، کوریڈور، موٹرویز یا انفراسٹرکچر نا ہیت ئِ کپنہ، نن مچ آملک انا شون و شونہالی کن گام گیج کننگ اُن۔ داوخت آ وزیراعظم بنوں نا پنچ یونین کونسل آتے کن گیس انا فراوانی، جتا روڈ آتا جوڑ جاڑ، بنوں نا پاور ہاﺅس نا ودکی و لکی مروت اٹی یونیورسٹی نا اڈتننگ نا پڑوئِ کرے۔ اوپارے کہ بنوں انڈسٹریل زون، کرک انڈسٹریل زون و کوہاٹ انڈسٹری زون آن دا علاقہ پھل آنبار مریک۔ داجاگہ نا کشت وکشار شون ہلیک۔ وزیراعظم ضلع کونسل بنوں و ڈومیل کن 20کروڑ نا گرانٹ نا ہم پڑوئِ کرے۔ اوپارے کہ لکی مروت و کرک اٹی پاسپورٹ آفس نا اڈتننگ نا کاریم نا بناءمسنے۔ اوپارے کہ قطبی وزیرستان نا زہمیک ننے جان آن ہم زیات دوست ئُ ، اوفتا زوت پدی ہِننگ و بحالی کن ترندی اٹ کاریم کننگ اُن۔ او بنوں بالی پٹ ئِ انٹرنیشنل بالی پٹ اس جوڑ کننگ نا پڑوئِ کرے تانکہ دا آسراتی آن باآسانی تہہ نا و پیشن نا ملک فضائی سفر کننگ کیرہ۔ آخر اٹی وزیراعظم مولانافضل الرحمان ، اکرم خان درانی و انجینئر امیر مقام تون دوتے دوتے اٹ شاغسا پوسکن آ پاکستان نا پرجوش نعرہ ئِ خلکر۔ اوکان مست جلسہ گاہ بننگ آ بنجائی وزیر اکرم خان درانی وزیراعظم ئِ روایتی دستار اس بینیفے و مہمان تے بنوں نا مخصوص چادراس پیش کرے۔ جلسہ ٹی مسلم لیگ (ن) نا راہشون پیر صابر شاہ ، گورنر خیبر پختونخوا اقبال ظفر جھگڑاتون اوار کارندہ غاتا بھاز بھلو کچ اس شرکت کرے۔ وزیراعظم بنوں ٹی کیہی شونداری ڈٹ آتا بنداو و افتتاح ئِ کرے۔ داوخت آ مولانا فضل الرحمان دعا کرفے۔
