اسلام آباد۔ 05اکتوبر (اے پی پی) وزیر مملکت پارلیمانی امور علی محمد خان پارینے کہ پشاور یونیورسٹی ٹی پیش بروک آ واقعہ ءِ سیاسی رنگ بایدے تننگپ ، سیاسی جماعت آتا داکاریم اف کہ او طالب علم آتے برانز کن ہشکا ایتے، صوبائی حکومت معاملہ نا ایسری کن کاریم کننگ ءِ، ہر معاملہ غا کمیٹی جوڑ کننگ سہی اف۔ جمعہ نا دے ایوان بالا ٹی سینیٹر جاوید عباسی، خالدہ پروین و ایلو باسک آتا اعتراضی ٹک انا ورندی ٹی اوپارے کہ اسہ طالب علم اسے ہم دا حق مفک کہ او ڈگری ہلنگ آن پد یونیورسٹی ہاسٹل اٹی پین اڈکے۔ اسٹوڈنٹس یونیورسٹی نا تینا تنظیم مریک و او معاملہ غاتے چارہ۔ اوپارے کہ پشاور یونیورسٹی ٹی براہ راست نیام تمنگپ ۔ صوبائی حکومت دا معاملہ ءِ ایسر کننگ نا کوشست کننگ ءِ۔ داوڑ توولدا کراچی ٹی اگہ نرس آتیا بیدادی مریک یا ولدا لاہور اٹی ینگ ڈاکٹرز و نابینا بندغ آتیا بیدادی کننگک تو دانا ہم کمیٹی اس جوڑ مریک۔ دامعاملہ تو ہژدہ می ترمیم نا خلاف ورزی نا مترادف ءِ۔ صوبائی حکومت نا کارروائی آن اگہ است جم مفیرے تو بے شک آئی جی خیبر پختونخوا ءِ بٹنگ انگے و صوبائی حکومت آن رپورٹ ہلنگے ولدا انتس کہ فیصلہ مرے یا کمیٹی اس جوڑ کیر او جوڑ کننگ کیرہ۔ داسہ کمیٹی نا کمک اٹ جاست و پاست کرفنگ وخت آن مست ءِ۔
