بنوں۔ 03مئی (اے پی پی) جمعیت علماءاسلام (ف) نا امیر مولانا فضل الرحمان وزیراعظم محمد نواز شریف نا بنوں آ بننگ نا خیرمقدم ئِ کرسا پارینے کہ وزیراعظم نا بنوں آ بننگ آن بنوں تون اوار پسماندہ انگا غٹ ضلع غاتے ٹی شون نا اسہ پوسکن ئُ سفراسینا بناءمریک، ہرا بندغ آک صوبہ نا مینڈیٹ نا دعویدار ئُ او شون نا پن آن ہم بلد افس۔ اوفتے صوبہ نا مذہبی ، تہذیبی و روایتی اقدار نا ماس تے کشنگ کن مسلط کننگانے، ہرا بندغ آک خیبر پختونخواہ نا اَل تیان خلیرہ او پنجاب نا شیر تے چڑیفنگ ئُ ، وزیراعظم جاگہ اس ہم اِمپک ولے او بندغ آتا واری بس تو اوفتے اُرا ملک نہ جیل، دا تینا مالم استیا کارہ، اوفتا ہسپتال آتا پیشن نا ملک اٹی آف شور کمپنی ارے، احتساب مس تو غٹ انا اسہ وڑ مریک، نن میدان عمل اٹی اُن۔ تینا تہذیب و روایت آتے ختم کننگ کن الیپنہ۔ سے شنبے آ داڑے لس جلسہ آن تینا تران اٹی اووزیراعظم محمد نواز شریف نا خیر مقدم ئِ کرے و پارے کہ وزیراعظم محمد نواز شریف نا بنوں آ بننگ ننکن تاریخی ئُ دے اسے ، نن است انا تہہ آن اودے ببو خیرٹ پانہ ، وزیراعظم نا بننگ آن صرف ضلع بنوں آخا غٹ سویلی ضلع ہراپاکستان نا پسماندہ انگا ضلع غاک سرپند کننگرہ اوفتا شون نا بناءمریک ، شون نا پوسکن آ سفر اکن وزیراعظم بسنے۔ اوپارے کہ شون نا دا سفر برجاسلک، پاکستان نا 67سالہ تاریخ اٹی داپسماندہ علاقہ غاتے ہمیش نظر اندا ز کننگا۔ او علاقہ غاتے 67سال آتے ٹی عمداََ پسماندہ تخنگانے، وزیراعظم نا سروکی ٹی شون نا سفر برجاسلک۔ اوپارے کہ سویلی ضلع غاتے کن ای پڑو کیوہ کہ 14مئی آ وزیراعظم ڈیرہ اسماعیل خان آ بریک و پاک چین اقتصادی راہداری نا افتتاح ئِ کیک۔ داوخت آ پین میگا پروجیکٹس آتا پڑوئِ کننگک۔ اوپارے کہ ہراخلقت آتا داوائِ کہ اوفتے تون صوبہ نا مینڈٹ ئِ اوفتا زمہ واری مریک کہ او صوبہئِ شون نا کسر آ شاغر ، ہموک شون نا کسرئِ توننگ ئُ ، دننگا بندغ آک شون نا پن آن نابلد ئُ، دا صوبہ ئِ جہالت و دیکی تہذیب نا کنڈا دننگ ئُ۔ اوپارے کہ اسہ زموار ڈل اس کنتون داہیت ئِ کرے کہ دا صوبہ ٹی مذہبی ماسک سوگو ئُ ، داکان مذہبی ماس تے کشنگ کن او خلقت آتے مسلط کننگانے، لاہور اٹی اونا کارندہ غاک نیاڑی تا گُد تے پلار، نن میدان ئِ عمل اٹی ان نن تینا اسلامی دودوربیدہ، تینا تہذیب و روایت آتے ختم کننگ کن الیپنہ۔ او تینا تران اٹی مستی پارے کہ ننے اوفتے تون واسطہ تمانے ہرادے و نن خاچرہ و پارہ کہ ننے سی پیک آ پت اٹی ہلنگ تو۔ پت اٹی بش مروک آتے ہلنگک۔ اوپارے کہ وزیراعظم آن استیفہ نا خواست کروک آک تینا صوبہ غاتے ٹی صرف اَل تے خلنگ نا غٹ آن بھلا زمہ واری ئِ خلکونو۔ اووزیراعظم آن خواست کرے کہ دہشت گردی آن تباہ حال وزیرستان نا خلقت آتا باعزت اُراتیا پدی ہِننگ و اوفتا نسخان آتا ازالہ ئِ کننگے۔ آئی ڈی پیز آتے تینا گل زمین آ پدی اتنگ نا بست و بند کننگے۔ اوپارے کہ قبائلی علاقہ غاتا استاد آتا اپ گریڈیشن نا پڑوئِ کننگے۔ ننا صوبہ ٹی اسلامیات نا مضمون المی ئِ، دا المی مضمون کن استاد آتا بھرتی آن پابندی ئِ ہرفنگے۔ اوپارے کہ دا گل زمین نا نیزگار و پسماندہ تپہ غاتا توارئِ خف تورے، ننا وزیراعظم تون بھاز انگا اومیت آک وابستہ ئُ۔ اومیت ئِ کہ وزیراعظم ننا اومیت آتیا پوروسلک۔
