اسلام آباد۔ 20جولائی (اے پی پی) نگران وزیراعظم جسٹس (ر) ناصر الملک پارینے کہ نیزگار تے جان جوڑی نا خذمت آتا فراوانی کن وزیراعظم نا قومی جان جوڑی پروگرام یونیورسل ہیلتھ کوریج نا مسخت آتا دوئی کننگ اٹ کمکار مریک۔ اوداہیت ءِ وزیراعظم نا قومی جان جوڑی پروگرام نا بارواٹ جمعہ نادے وزیراعظم آفس اٹی بریفنگ نا کماشی ءِ کرسا پارے۔ سیکرٹری قومی جان جوڑی خذمت کیپٹن (ر) زاہد سعید پروگرام نا تصور و دنگ ءِ مون آ تخا۔ اووزیراعظم ءِ پارے کہ دا پروگرام نیزگاری آن شیف زند ءِ تدیفوک آ نیزگار خاہوت آتے چندی سرکاری و نجی آسراتی تیٹی جان جوڑی نا مفت خذمت آتا فراوانی نا کمک اٹ اوفتا جان جوڑی نا خڑچ آتے پورو کننگ ءِ۔ داپاننگاکہ داوخت اسکان مچ آ ملک انا 38 ضلع غاتے ٹی 32لکھ خاہوت آتے پروگرام نا رداٹ رجسٹرڈ کننگانے۔ دیوان ءِ پاننگاکہ ناجوڑی تا بابت اولیتی پیکج نا رداٹ سالانہ دونیم لکھ روپئی فی خاہوت ءِ مالی کمک فراوان کننگ انگ ءِ ہرافتے ٹی است انا مرض، شکست، پیچیدہ متعدی مرض، کیموتھراپی ، ریڈیو تھراپی ، سرجری و ایلو خراب انگا ناجوڑیک اوار ءُ۔ فی خاہوت 50 ہزار روپئی مالیت نا سیکنڈری کیئر پیکج نا رداٹ زچہ کن خذمت، ٹرانسپورٹیشن خڑچ و ایلو خڑچ آک اوار ءُ۔ داہم پاننگاکہ مالی امداد و دنگ ءِ پروگرام نا ارٹ میکو مرحلہ ٹی ودفنگ انگ ءِ۔ 2021 ء اسکان داپروگرام نا دنگ ملک انا مچ آ آبادی اسکان ودفنگک۔
