اسلام آباد۔ 19 جولائی(اے پی پی)چین پاکستان اقتصادی راہداری ڈٹ انا پاکستان اٹی پروجیکٹ ڈائریکٹر حسن داؤد بٹ دوٹوک وڑاٹ سی پیک ڈٹ آ کاریم تعطل نا گواچی مننگ نا بابت خبرآتا تردید ءِ کرسا پارے کہ سی پیک ڈٹ آ کاریم ترندی اٹ برجاءِ ، دا بابت منفی خبرآتیٹی ہچ ءُ راستکی اس اف ، ہندا مالی سال اٹی گوادر انٹرنیشنل ایئر پورٹ آ جوڑ جاڑی کاریم نا بناءِ کننگک۔ داخیال آتا درشانی ءِ او اے پی پی تون ہیت وگپ اٹی کرے۔ اوپارے کہ سی پیک نا رداٹ انفراسٹرکچر ، توانائی و چندی کیہی ڈٹ آتیا ترندی اٹ کاریم برجاءِ۔ اوپارے کہ سی پیک نا رداٹ جاری پاکستان و چین نا کمکاری صنعتی شونداری نا مرحلہ ٹی پترینگانے ، دامرحلہ ٹی نئے بیرہ چین بلکن ڈیہہ نا غٹ ملک آک پبی بشخ ہلنگ کیرہ۔ اوپارے کہ پاکستان سی پیک نا رداٹ جوڑ مروک آ خصوصی اکنامک زون تیٹی زرکاری کن بے کچ لبرل پالیسی اس جوڑ کرینے و دا کمکاری نا بنداوی مسخت جائنٹ وینچرز ءِ مون آ دننگ ناءِ تانکہ پاکستان صنعت آتا پیداواری لائخی تیٹی ودکی کننگ مرے و ہندا بشخ آتا سوب پاکستان نئے بیرہ پائیدار شونداری نا دوئی کننگ اٹ سرسہب مریک بلکن داڑے لکھ آ ورناتے روزگار نا وارخواہی دو بریک۔ اوپارے کہ گدرینگوک آ چار سال اٹی سی پیک آن معاشی کسابازاری نا چٹفنگ، پائیدار شونداری ہدف آتا دوئی کننگ اٹ کمک رسینگانے۔ اوپارے کہ بیلٹ اینڈ روڈ ڈٹ انا کمک اٹ چین، سنٹرل ایشیا، سویلی ایشیاءِ گنڈنگک ، دا معاشی شونداری نا کسر اسے و پاکستان دانا بنجاءِ۔ اوپارے کہ سی پیک اسہ گیم چینجر ءُ ڈٹ اسے ، ہراڑآن ڈیہہ نا 3ارب خلقت فائدہ ہرفرہ۔ اوپارے کہ سی پیک اٹیی مروک آ کل زرکاری نا 80 درسد توانائی نا بشخ اٹی ءِ، سی پیک نا سوب توانائی نا بشخ اٹی پاکستان نا تاریخ نا غٹ آن بھلا زرکاری 35ارب ڈالر کننگانے۔ توانائی ڈٹ آتا سوب الس ءِ بجلی ملک وخت اس کہ صنعت کار نا تہو پہیہ اسہ وارولدا چلینگ نا بناءِ کیک۔ اوپارے کہ سی پیک نا بروک آ مرحلہ ٹی صنعتی بشخ اٹی کمکاری آن پاکستان سویلی ایشیاٹی صنعتی پیداوار نا بنجاء جوڑ مرسا مون آ بریک۔
