راولپنڈی۔ 28 دسمبر (اے پی پی) پاک فوج انا سروک جنرل قمر جاوید باجوہ دہشت گردی ٹی اوار پین 8 دہشت گرد آتا سزائے موت و 3دہشت گرد آتا عمر قید نا سزاتے پک کرینے، فوجی عدالت آک دا دہشت گرد آتے اسماعیلی برادری نا بس آ جلہو، راجی کارندہ سبین محمود نا خون ، سیکورٹی و کانود نافذ کروک آ ادارہ غاتیا جلہو و اِراچینی انجینئر آتا برمتہ و دہشت گردی نا ایلو سرجزآتیٹی اوار مننگ آ سزابنفیسس، دا دہشت گردی نا واقعہ غاتیٹی جم وڑاٹ 90 بندغ تپاخت و 99 بندغ ٹھپی مسوسر۔ پاک فوج انا شعبہ تعلقات عامہ (آئی ایس پی آر) نا ڈائریکٹر جنرل میجر جنرل آصف غفور نا رداٹ چارشنبے آ پاک فوج انا سروک جنرل قمر جاوید باجوہ دہشت گردی نا کیہی کارروائی تیٹی اوار پین 8 دہشت گرد آتا سزائے موت و مسہ دہشت گرد آتے عمر قید نا سزاتے پک کرینے۔ آئی ایس پی آر آن جاری سرجم احوال آتا رداٹ حافظ محمد عمر الیاس ولد افضل احمد، علی رحمان الیاس ولد آصف الرحمان، عبدالسلام الیاس،/ رضوان عظیم ولد محمد نذراللہ اسلام و خرم شفیق الیاس عبداللہ منصور/عبداللہ منصوری ولد محمد شفیق کالعدم تنظیم نا متحرک کارندہ ئسر۔ داہرچار آ دہشت گرد آک صفورہ گوٹھ انا ہند آ اسماعیلی برادری نا بس آ جلہو کریر ہراٹی 45بندغ تپاخت کریسر۔ دا دہشت گرد آک راجی کارندہ سبین محمود نا خون اٹی ہم اوار ئسر۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ عدالت اوفتے سزائے موت بنفیسس ۔ مسلم خان ولد عبدالرشید کالعدم تنظیم نا ترجمان ئس۔ دا کودک شاری ، سلہہ بند فوج و کانود نافذ کروک آ ادارہ غاتیا جلہو آتیٹی اوار ئس ہراٹی انسپکٹر شیر علی تون اوار 31بندغ تپاخت و 69 بندغ ٹھپی مسوسر۔ دا پاک فوج انا کیپٹن نجم ریاض راجہ ، کیپٹن جنید خان، نائیک شاہد رسول و لانس نائیک شکیل احمد ئِ تڑنگ و تاوان کن اِراچینی انجینئر و اسہ ہندی شاری اسے برمتہ کننگ نا کارروائی تیٹی اوار ئس۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ عدالت اودے سزائے موت بنفیسس۔ محمد یوسف ولد خالد خان کالعدم تنظیم نا باسک ئس۔ دا سلہہ بند فوج ، کانود نافذ کروک آ ادارہ غاتیا جلہو آتیٹی اوارئس ہراٹی 4فوجی ورناتپاخت و 19 بندغ ٹھپی مسوسر۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ سزائے موت بنفیسس۔ سیف اللہ ولد نجیب حسین کالعدم تنظیم نا کارندہ ئس ۔ دا کودک شاری ، کانود نافذ کروک آ ادارہ غاتیا جلہو آتیٹی اوار ئس ہراٹی اے ایس آئی فرید خان وپولیس کانسٹیبل تپاخت و چندی کارندہ غاک ٹھپی مسوسر۔ اونا کوزہ آن دھماکہ خیز مواد و بھلو سلہہ اس ہم دوئی کننگا۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ عدالت اودے سزائے موت بنفیسس۔ بلال محمود ولد قاری محمود الحسن کالعدم تنظیم نا کارندہ اس ئس۔ دا کانود نافذ کروک آ ادارہ غاتیا جلہو آتیٹی اوار ئس ہراٹی اِرا پولیس کارندہ تپاخت و 4ٹھپی مسوسر۔ اونا کوزہ آن دھماکہ خیز مواد و سلہہ ہم دوئی کننگا۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ سزائے موت بنفیسس۔ سرتاج علی ولد بخت افسر کالعدم تنظیم نا باسک ئس۔ دا دہشت گرد آتا مالی کمکاری تون اوار ایلو سرجزآتیٹی اوار ئس۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ عدالت اودے عمر قید نا سزابنفیسس۔ محمود خان ولد بخت بلند کالعدم تنظیم نا باسک ئس۔ دا چائنیز انجینئر آتے تاوان کن برمتہ کننگ نا کارروائی تیٹی اوار ئس۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آعدالت اودے 20 سال قید انا سزابنفیسس۔ فضل غفار ولد عاقل خان کالعدم تنظیم نا باسک ئس۔ دا پولیس اسٹیشن شموزئی آ جلہو اٹی اوار ئس ، پولیس اسٹیشن آن پولیس افسر و ایف سی نا ورناتے برمتہ کننگا۔ ٹرائل کورٹ و مجسٹریٹ نا مون آ غٹ ڈوہ تے امنا کننگ آ عدالت اودے 20 سال قید انا سزابنفیسس۔
