اسلام آباد۔ 04جون (اے پی پی) صدر مملکت ممنون حسین پارینے کہ پاکستان اٹی درملکی زرکار آتے کن بے کچ دوستانہ چاگڑد ، بے کچ لچکدار و گچین کانود درستی راستی کرفنگانے ہر ازرکار و پاکستان ہڑتوم آتے کن فائدہ مند جوڑ مننگ کیک۔ اوداہیتءِ دوشنبے نادے یونان نا دزکش مروک آ سفیر دیمی ٹریوس زرئے ٹس تون ہیت وگپ کرسا پارے۔ داوخت آ ایلو بڑزکو کمامدارآک ہم ساڑی ئسر ۔ صدر مملکت پارے کہ پاکستان نا یونان اتون بے کچ گہرا ہڑتوم آ کنڈآتا تعلقداریک ءُ ہرافتے ٹی پین کڑمبی ودی کننگ کن دزکش مروک آ سفیر بھاز خواری اٹ کاریم کرینے ہراڑآ او مبارکباد نا حقدار ءِ۔ اوپارے کہ ہڑتوم آ ملک آک صنعت، واپار و مواصلات نا بشخ آتیٹی کمکاری نا پوسکن ءُ کسر پٹنگ کیرہ۔ اواومیت ظاہر کرے کہ یونان نا صنعت کار ، پوریاگر و زرکار آک پاکستان اٹی زرکاری نا وارخواہی تیان زیات آن زیات فائدہ ہرفرہ۔ اوپارے کہ پاک چین اقتصادی راہداری دا چرجوئی ٹی بے کچ مناسب موقع فراوان کننگ ءِ۔ دزکش مروک آسفیر دیمی ٹریوس زرئے ٹس پرجوش مہمان نوازی آ صدر مملکت ، حکومت و الس نا منت واری ءِ ہرفے وپارے کہ پاکستان اٹی اڈ کننگ نا خوشگوار یات آک اونا ذہن اٹ مدام یات سلرہ۔
