اسلام آباد۔ 02مئی (اے پی پی) مسلم لیگ (ن) نا راہشون و قومی اسمبلی نا باسک طلال چوہدری پارینے کہ تحریک انصاف نا چیئرمین کڑزمعاف کرفوک آتے بچفنگ نا کوشست کننگ ئِ، بھلا بھلا داوا تا باوجود پی ٹی آئی لاہور اٹی 5ہزار آن زیات بندغ اسیجا کننگ کتو۔ دوشنبے آ داڑے الیکشن کمیشن نا پیشن صحافی تتون ہیت و گپ کرسا اوپارے کہ ہراخلقت آک کڑز آتے معاف کرفینو او اسہ ایلو ئِ رکھ تننگ کن داسا دوتے دوتے اٹ شاغسا سلوک ئُ و اسہ ایلو آ قومی دولت ئِ پلنگ نا دوبہ غاتے خلوک آک پٹ و پولی کمیشن نا کاریم نا وڑوڈول ئِ طے کننگ کن داسا اسہ ایلو تون ملانو۔ عمران خان داہیت انا ورندی ئِ تفننگ ئِ کہ جہانگیر ترین کڑزآتے معاف انت اکن کرفے و علیم خان تینا میرات آتے انت اکن اودیم کرے۔ اوپارے کہ قوم چاہنگ خواہک کہ عمران خان ہراشرط آ زرداری و مسلم لیگ (ق) نا سروک نا کنڈا سنگتی نا دوتے ودفینے۔ داوخت آ داخلہ امور آن بابت پارلیمانی سیکرٹری مریم اورنگزیب پارے کہ تحریک انصاف نا سروک ملک انا شون و شونہالی نا کسر اٹی اڑاند شاغنگ ئِ۔
