اسلام آباد۔ 02مئی (اے پی پی) وزیراعظم محمد نواز شریف پارینے کہ پاکستان علاقائی ہم آہنگی نا سرگرمی آن پیروی ئِ کننگ ئِ و 46ارب ڈالر نا زرکاری نا حامل پاک چین اقتصادی راہداری و بنداوی ڈھانچہ نا ڈٹ آتا مسخت مچ آ ڈیہہ ٹی واپارئِ مون آ دروئی ئِ۔ اوداہیت ئِ جہانی واپاری تنظیم (ڈبلیوٹی او) نا ڈائریکٹر جنرل ربرٹو ایزی ویدو تون دوشنبے آ وزیراعظم ہاﺅس اٹی ہیت و گپ کرسا پارے۔ وزیراعظم پارے کہ سی پیک علاقائی ملک آتا نیام اٹ واپاراٹی وسیع تر ودکی و علاقہ نا کروڑ آ الس نا آب ئِ گچین جوڑ کننگ نا بے پناہ لائخی تخک۔ وزیراعظم واپار نا اہمیت ئِ تالان کرسا پارے کہ پاکستان گلوبل سپلائی چین اٹی پبی ہم آہنگی نا دوئی کن واپار آن بابت تینا قوانین ئِ ہم آہنگ جوڑ کننگ ئِ۔ پاکستان ڈبلیو ٹی او تون تینا شریداری ئِ ودفنگ کن تیار ئِ و بین الاقوامی مسابقانہ واپاری تصورات آتا خیر مقدم ئِ کیک۔ وزیراعظم پارے کہ ساڑی آ جمہوری حکومت نا تحت امن و ایمنی نا گچین حالیت آتا نتیجہ ٹی اقتصادی سوگوی ودی مسنے۔ اوپارے کہ ننا حکومت بجلی نا کاختی نا ویل انا مون ئِ توننگ ئِ و ہم گڑاس بجلی اُراتا پوروی آن گڈ 2018ءاسکان دا ویل ئِ پوروی وڑاٹ ایسر کننگ نا اومیت تخک۔ اوپارے کہ کراچی ٹی امن ئِ بحال کننگانے و سرسہب فوجی آپریشن نا سوب دہشت گرد آک نرنگ ئُ ، او گام گیج آتیان پاکستان ئِ کاروباری برادری و زرکار آتا پت ئِ بحال کریسہ پیشن نا زرکاری ئِ راغب اٹی کمک رسینگک۔ ڈائریکٹر جنرل ڈبلیو ٹی او جم و جوش اٹ خیر مقدم آ وزیراعظم نا منت واری ئِ ادا کرسا پارے کہ پاکستان کاروبار و زرکاری کن مثالی ئُ ہند اسے۔ اووزیراعظم ئِ معیشت نا بارواٹی اونا وژن و سیاسی سوگوی ، گچین سیکورٹی، توانائی ٹی خودکفالت نا دوئی و بنداوی ڈھانچہ نا شون اکن اونا کوشست آتا ستائِ کرے۔
