ایشیائی صدی ءِ سھب درآھگءَ اِنت، خطہ ءِ تہا راستیں آسراتی ءَ چہ پاھدگ ءُ مر طوط کوشستانی وسیلگءَ امن ءُ ایمنی ، دیمروئی ءُ وشھالی ءِ یکجائی مولءُ مراد مراد ھاسل کنگ بنت
سانیا(چین)۔10اپریل (اے پی پی) مزن وزیر شاہد خاقان عباسی ءَ دمگی نزیکی، آزاتیں بیپار ءُ گیش اقتصادی دیمروئی ءَ را سگءُ اوپار ءُ سنگتی ءِ گیشی ءُ بیم کاری ءِ ھلاسی ءِ بن لیک اِتگءُ گشتگ کہ خطہ ءِ تہا راستیں آسراتی ءَ چہ پاھدگ ءُ مربوط کوشستانی وسیلگءَ امنءُ ایمنی ، دیمروئی ءُ وشھالی ءِ یکجائی مول ءُ مراد ھاسل کنگ بنت۔ آئیءَ اے گپ چین ءِ صوبہ ہینان ءَ باؤ اقتصادی فورم برائے ایشیاء ءِ بنگیجی مراگشءَ گوں کتگ۔ مزن وزیر ءَ گشتگ کہ انوگیں رمسءَ پاک چین سیادی ءِ ایچ درور نیست مہ ھمک پڑءَ برات اَنت۔ مئے خطہ ءِ تہا دوستیءُ سنگتی مھکم اِنت۔ آئیءَ گشتگ کہ پاکستان گیش نزیکیءِ وسیلگءَ امن ءُ ایمنی ءُ وشھالی ءِ نوکیں دورءِ بندات ءِ ھاترءَ چینءِ گوما شریداری کنگءَ اِنت۔ پاکستان ءِ تہا مرچی گام گام ءَ یک بہادریں نوکیں ایشیاء جوڈ بوھگءَ اِنت۔ آئیءَ گشتگ کہ پاک چین اقتصادی راہداری ’’ بیلٹ اینڈروڈ اقدام‘‘ ءِ فلیگ شپ منصوبہ اِنت کہ ایشیءِ جوانیں برورد اَست اَنت۔ مزن وزیر ءَ گشتگ کہ باؤ فورم ایشیا ء ءِ ھوالگءَ میاں اوستمانی اقتصادی نظام پدر کنگ ءُ دنیاءِ تہا وتی جاھ جوڈ کنگءِ ھوالگءَ جوانیں پلیٹ فارم ءِ ارزشتءَ دیمءَ اَتکگ۔ دنیاءِ تہا ٹیکنالوجی ءِ ھوالگءَ سوبمندی ھاسل بوھگءَ اِنت ، چارمی صنعتی آشوب پیداک اِنت ءُ مصنوعی ذہانت ربوٹکس، بائیوٹیکنالوجی وڈیں ٹیکنالوجی مئے زندانی تہا پیداک اَنت ءُ آئیءَ نوکیں زند دیئگءَ اِنت۔مزن وزیرءَ گشتگ کہ 2017ءِ تہا دنیا ءِ کمءُ گیش یک نیمگی اقتصادی نموایشیا ء بحرالکاہل خطہ ءَ چہ بوتگ کہ ایشیءِ تہا چینءِ بھر گیش اِنت۔ مزن وزیرءَ گشتگ کہ چینءِ صدر شی جن پنگ ءِ بلیٹ اینڈ روڈ ءِ راج دپتری گامگیج میاں اوستمانی اُلسی گہبود ءِ تہا اِنت کہ ایشی ءَ چہ درساں پاھدگ رسیت ۔ مزن وزیر شاہد خاقان عباسی ءَ گشتگ کہ مہ ریل ، روڈءُ بنکی ڈھانچہ ءِ منصوبہ ءِ وسیلگ ءَ سی پیک ءِ بروبرداں چہ پاھدگ چست کنگءَ اَنت۔ ایشی ءَ چہ روزگارءِ موھ ودی بوھگءَ اَنت، 10ہزار میگاواٹ بجلی مئے راجی گرڈ ءِ تہا ھواربوتگ ءُ توانائی ءِ دیریگیں جیڑھ گیشءُ گیوار بوھگءَ اِنت۔ وسط مدتی ءِ ھوالگءَ مئے نمو ءِ شرح میاں اوستمانی اوسطءَ چہ دیم ءَ رؤگءِ اُمیت اِنت 2050ءَ مہ دنیاءِ 15می مزنیں معیشت بنت۔ آئیءَ گشتگ کہ پاکستانءِ 207ملین ءِ آباتی مزنیں انسانی آسراتی اِنت ءُ اے یک مزنیں صارف مارکیٹ اِت۔ پاکستان ءِ تہا زرکاری ءُ بیپاری کنگءِ باز موھ اَست۔ مزن وزیرءَ گشتگ کہ پاکستانءِ تہا 14کروڑءَ چہ گیش موبائل فون کارمرز کنوک اَنت۔ انٹرنیٹ ءُ براڈ بینڈ سروسز ملک ءِ کُنڈ کُنڈ ءَ سربوتگ ءُ ای ۔کامرس گیش بوھگءَ اِنت، ’’ علی بابا‘‘ وڈیں سرجمیں دنیاءَ چہ دگہ ٹیلی کام پڑ ءِ کمپنی پاکستانءَ وتی آسراتی ءَ را گیش کنگءَ اَنت۔ آئیءَ گشتگ کہ پاکستان شاھ دگ ، ریلویز ، توانائی گرڈز ءُ دمگی نزیکی ءِ نیٹ ورک ءَ را گیش کنگ لوٹ ایت۔ ھمے سوبءَ مہ ’’ تاپی ‘‘ ءُ کاسا 100وڈیں دمگی منصوبہ جات ءِ دائم ءَ منوک بوتگ اَنت۔ مزن وزیر ءَ صدر شی جن پنگ ءَ را صدر بوھگءَ مراد بات داتءُ یک رندے پدا گچین بوھگءِ مراد بات داتگ ءُ اے اُمیتءِ درشانی کتگ کہ آئیءِ زانت کاری ءُ رھشونی ءَ چین دیم روئیءِ سفرءَ رھادگ بیت۔ مزن وزیرءَ اے چینی بتل ءِ گوما وتی گوشتانک ھلاس کتگ ’’ کسے کہ کوھءَ سُرینگ لوٹ ایت آ کسان کسانیں سنگءَ چہ بندات کنت‘‘ ۔ مزن وزیر ءَ گشتگ کہ اے وھداِنت کہ سنگ چست کنگءُ کوھ سُرینگ بہ بنت۔ صدر جن پنگ ءَ سربوھگءَ مزن وزیر شاہد خاقان عباسی ءَ را وش اَتک کتگ۔ دری کارانی مزن وزیر خواجہ محمد آصف ، تہی کارانی وزیر احسن اقبال، چین ءَ پاکستان ءِ سفیر مسعود خالد ءُ سینئر حکام ھم اے موھ ءَ ساڑی بوتگ۔
