مواصلات ، مالیاتی ءُ روایتی نظام ءَ را سائبر اُرشاں چہ رکھینگءِ ھاترءَ انفارمیشن سکیورٹی ادارگاناں سائبر سپیس ءِ چارءُ تپاسی ءِ ضلورت اِنت
اسلام آباد۔29مارچ(اے پی پی) راجی سلامتی ءِ صلہ کار ناصر خان جنجوعہ ءَ سائبر سکیورٹی ءِ جیڑھ ءَ را گرءُ دار کنگءِ ھاترءَ گامگیج چست کنگءِ ضلورتءِ سرءَ زور پِرداتگءُ گشت کہ مواصلاتی، مالیاتی ءُ روایتی نظام ءَ را سائبر اُرشاں چہ رکھینگ ءِ ھاترءَ ملک ءِ انفارمیشن سکیورٹی ادارگاناں سائبر سپیس ءِ چارءُ تپاسی کنگءِ ضلورت اِنت۔ آ پنچ شمبے ءِ روچءَ اسلام آبادءَ پاکستان انفارمیشن سکیورٹی ایسوسی ایشن ءِ چیردستی ءَ سائبر سکیورٹی پاکستان ویژں 2025ءِ سرھال ءِ سرءَ جوڈ بوتگیں کانفرنسءَ گوں تران کنگءَ بوتگ۔ آئیءَ گشتگ کہ اُلسءُ حکومت ءَ را سائبر سکیورٹی ھترہ ءَ را ترندیءَ گوں مارگ لوٹ ایت۔ آئی ءَ زانتءُ کارءُ کواسانی سرءَ زور پِرداتگ کہ آ اے ھوالگءَ سرکاری محکمہ ءُ ملک ءِ اُلس ءِ کمک ءَ بہ کن اَنت۔اے موھءِ سرءَ تران کنانءَ سائبر سکیورٹی ملائیشیا ءِ چیف ایگزیکٹو ڈاکٹر امین الدین عبدالوہاب ءَ گشتگ کہ ملائیشیا ءَ سائبر سکیورٹی ءِ جیڑھءُ جنجالاں گرءُ دار کنگءِ ھاترءَ وھدءِ سرءَ گامگیج چست کت کہ ایشانی تہا سائبر کانود ءُ ھندی جامعات ءِ گوما شریداری ھوار اَنت۔ پاکستان انفارمیشن ایجنسی ءِ صدر عمار جعفری ءَ گشتگ کہ پاکستان ءِ باندات وھدءِ سرءَ دیمروئی ءُ ملک ءِ تہا سائبر سکیورٹی ءَ را المی کنگءَ گوں بندوک اِنت۔ انفارمیشن سکیورٹی ادارگانی نمائدگءُ نیشنل پولیس فاؤنڈیشن ءِ نمائندگ ءُ مزنیں کساسے ءَ نودربر کانفرنسءَ ھوار بوتگ اَنت۔
