پاکستان ءُ کروشیا ءِ دوستی ءِ سیادی یکے دومی ءِ احترام، نیک راھی ءُ یکجائی مفاد ءِ بنیات ءَ مزن وزیر شہباز شریف ءَ گوں کروشیا ءِ درئی کار ءُ یورپی کارانی وزیر ءَ گپ ءُ تران

اسلام آباد۔9جولائی  (اے پی پی): مزن وزیر محمد شہباز شریف ءَ پاکستان ءُ کروشیا ءِ نیام ءَ تجارت ءُ سرمایہ کاری، انفارمیشن ٹیکنالوجی، کشت ءُ کشاری، سیل ءُ سواد ءُ ہنرمندیں مردمی قوت ءَ ھوار جتا جتائیں پڑ آنی تہ ءَ کمک ءَ را گیش دیمروئی دیگ ءِ واھشت ءِ درشان کنان ءَ گوشت کہ دوئیں ملک آنی نیام ءَ دوستی ءِ سیادی ءِ بنیات ءَ جوانیں ءُ یکوئی ءِ سر ءَ انت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی جمہوریہ کروشیا ءِ دری کار ءُ یورپی کارانی وزیر ڈاکٹر گورڈن گرین وچ ریڈمنڈ ءَ گوں گپ ءُ تران کنان ءَ کتگ اَنت آئی ءَ مزن وزیر گس ءَ آئی ءَ گوں گند ءُ نند کتگ۔ گند ءُ نند ءَ نائب مزن وزیر ءُ درئی کارانی وزیر سنائر محمد اسحاق ڈار ءُ دری کارانی سیکرٹری آمنہ بلوچ ھم ساڑی ات ۔ مزن وزیر ئَ گوشت کہ پاکستان ءُ کروشیا ءِ دوستی ءِ سیادی وت مہ وتی احترام، نیک راھی ءُ یکجائی نپ ءِ بنیات اِنت۔ مزن وزیر ءَ پاکستان ءِ واھشت ءِ درشان کت کہ تجارت ءُ سرمایہ کاری، انفارمیشن ٹیکنالوجی، رابطہ، کشت ءُ کشار، جان سلامتی ءُ ہنرمندیں مردمی توان ءَ ہوار جتا جتائیں شوبگ آنی تہ ءَ دو نیمگی کمک ءَ را گیش دیمروئی دیگ بہ بیت۔ مزن وزیر ءَ کروشیا ءِ صدر میلانوویچ  ءُ   مزن وزیر  آندرے پلینکوویچ  ءَ را نیکیں واھگ آنی درشان کت ءُ پاکستان ءِ سرکاری تر ءُ تاب ءِ واستہ دلجمی ءِ دعوت ھم دات۔ کروشیا ءِ دری کارانی وزیر ءَ مزن وزیر ءِ وشیں وش اتک ءِ شگر ءُ منت گپت ءُ گوشت کہ اسلام آباد ءِ تر ءُ تاب منی واستہ شرپ ءِ گپ انت۔ آئی ءَ دمگی امن ءِ کوشست آنی تہ ءَ پاکستان ءُ آئی ءِ سروکی ءِ نامداریں کرد ءِ ستا کرتگ ءُ وتی حکومت ءِ واھشت ءِ درشانی کتگ کہ آ پاکستان ءُ کروشیا ءِ سیادی ءَ را وت مہ وتی ءِ دراھیں پڑ آنی تہ ءَ گیش ءُ گیوار بہ کنت۔