کروشیا ءِ ڈل ءَ نائب مزن وزیر محمد اسحاق ڈار ءَ گوں گند ءُ نند کتگ، جتا جتائیں پڑاں سیادی ءَ را گیش مھکم کنگ ءِ راہ ءُ درانی سر ءَ گپ ءُ تران

اسلام آباد۔9جولائی  (اے پی پی): کروشیا ءِ درئی کار ءُ یورپی کارانی وزیر ڈاکٹر گورڈن گرلیچ ریڈمین    ءُ کروشیا ءِ ڈل ءَ پنچ شمبے ءِ روچ ءَ نائب مزن وزیر ءُ درئی کارانی وزیر محمد اسحاق ڈار ءَ گوں گند ءُ نند کت۔ درئی کارانی کارگس ءِ رد ءَ اے موہ ءِ سر ءَ دوئیں نیمگ ءَ تجارت، سرمایہ کاری، کشت ءُ کشاری، مردمی قوت ءِ ٹرانسفر، ویزا ءِ آسراتی، وانگ ءُ زانگ، دفاع، موسمیاتی مٹ، چاگرد، انفراسٹرکچر ءُ انفارمیشن ٹیکنالوجی ءِ شوبگ آنی تہ ءَ سیادی ءَ را گیش مھکم کنگ ءِ راہ آنی سر ءَ ھیال ریچی کنگ بوتگ۔ پاکستان ءُ یورپی یونین ءِ نیام ءَ کمک ءِ جتا جتائیں تک ءُ پھنات ءُ دمگی ءُ جہانی ارزشت ءِ جیڈھ آنی سر ءَ ھم حیال ءُ لیکہ درشان کنگ بوت۔ وزیر ءِ درئی کار ءَ پائیدار دیمروئی، دمگی استحکام ءُ جھان ءِ اقتصادی یکوئی ءِ تہ ءَ رابطہ ءِ ارزشت ءَ را منگ ءَ پاکستان ءُ کروشیا ءِ بندرگاہ آنی نیام ءَ کمک ءِ امکانات ءُ موہ آنی سر ءَ ھم گپ ءُ تران کت۔ دوئیں ملک آنی نیام ءَ اے سال ءِ گڈ ءَ یا 2027ءِ بندات ءَ دو نیمگی سیاسی شور ءُ سلاھ کنگ ءِ سر ءَ تپاک کنگ بوتگ۔اے تر ءُ تاب دوئیں ملک آنی نیام ءَ دو نیمگی سیادی آناں گیش مھکم کنگ ءِ ھاترا یک ھاسیں گامگیج اِنت۔ ایشی ءَ چہ پیسر نائب مزن وزیر ءُ دری کارانی وزیر ایس محمد اسحاق ڈار ءَ کروشیا ءِ درئی کار ءُ یورپی کارانی وزیر ڈاکٹر گورڈن گرلچ ریڈمنڈ ءُ کروشیا ءِ ڈل ءِ دری کارانی وزارت ءَ سر بوھگ ءِ وھد ءَ وش آتک کت۔