ناشرکاری ءِ ھلاپ درساں چہ گیش جنگ پاکستانءَ کتگ، مئے سکیورٹی فورس ، پولیس ، پیراملٹری فورسزءُ اُلسءَ اے جنگءِ تہا وتی جان ندر کتگ اَنت، ملکءِ تہا امن ءُ ایمنی بوتگ
ملالہ یوسفزئی ءَ را ’’ لوگءَ وش اَتک اِنت ملالہ‘‘ گشتگ ءُ یک رندے پدا وطن واتری ءِ سرءَ وش اَتک کتگ
وتی ملکءِ یل کنگ سک باز گران بوتگ، ملالہ یوسف زئی
اسلام آباد۔29مارچ(اے پی پی ) مزن وزیر شاہد خاقان عباسی ءَ گشتگ کہ دنیاءِ تہا ناشرکاری ءِ ھلاپ درساں چہ گیش جنگ پاکستانءَ کتگ، مئے سکیورٹی فورس ، پولیس ، پیراملٹری فورسزءُ اُلسءَ اے جنگءِ تہا وتی جان ندر کتگ اَنت، ملکءِ تہا امن ءُ ایمنی بوتگ ۔ آپنچ شمبے ءِ روچءَ مزن وزیر کارگس ءَ نوبل داد کٹ اِتگیں ملالہ یوسف زئی ءِ شرپءَ داتگیں مراگشءَ گوں تران کنگءَ بوتگ۔ اے موھءِ سرءَ بازیں بنجاھی وزیر ، راجی اسمبلی ءِ باسک ، نودربر ءُ ایندگہ مردم ساڑی بوتگ اَنت۔ مراگشءِ تہا ملالہ یوسف زئی ءَ ھم تران کتگ وھدے کہ مراگشءِ تہا ھوار وزیرءُ راجی اسمبلی ءِ باسکاں ملالہ یوسف زئی ءَ را آئی ءِ ازمت ءِ سرءَ دادءُ سلام پیش کتگ۔ مزن وزیر شاہد خاقان عباسی ءَ مراگش ءَ گوں تران کتگءُ گشتگ کہ مئے اے کسانیں جنکءَ دنیاءِ تہا بے مٹیں سوبمندی ھاسل کتگءُ وتی لوگءَ واتر سربوتگ۔ آئیءَ گشتگ کہ ملالہ یوسف زئی وھد ے کہ ادءَ چہ شتگ 13سال ءِ بوتگ ءُ نوں واتر بوتگ کہ مزنیں ءُ نامداریں مردمے جوڈ بتگ۔ دنیاءَ آئیءَ را شرپءُ عزت داتگ ، پاکستانءَ را ھم آئی ءَ را عزت دنت۔ آئیءَ ملالہ یوسف زئی ءَ را گشتگ کہ پاکستان تئی لوگ اِنت ، مہ ترا وش اَتک کناں ، تو ھروھدءَ بہ لوٹ اِت اَتک کنے ، نوں تو انچاھیں مردمے نہ اِت ، تئی سکیورٹی مئے سرءَ المی اِنت۔ آئیءَ گشتگ کہ وھدے ملالہ یوسف زئی پاکستانءَ چہ شتگ ناشرکاری سک باز بوتگ۔ پاکستانءَ ناشرکاری ءِ ھلاپءَ جنگ کتگ مئے سکیورٹی فورسز، پولیس ، پیراملٹری فورس آنی ورناھءُ افسرءُ اُلس ءَ ناشرکاریءِ ھلاپ ءَ جنگ کتگءُ وتی جان ندر کتگ اَنت ۔ آئیءَ مراگشءِ گڈی ءَ ملالہ یوسفزئی ءَ را ’’ ویلکم ہوم ملالہ ‘‘ گشتگءُ یک رندے پدا وطن واتر بوھگءَ وش اَتک کتگ۔ ایشیءَ چہ پیسر اے مراگشءَ گوں تران کنانءَ نوبل داد کٹ اِتگیں ملالہ یوسفزئی ءَ گشتگ کہ پنچ سالءُ نیم پد وطن ءَ واتر بوھگءَ سک باز وشی بوھگءَ اِنت۔ آئیءَ گشتگ کہ گوستگیں پنچ سالاں من ھمے واب دیستگ کہ وتی وطنءَ واتر بہ باں ۔ منءَ ایچ باور بوھگءَ نہ اِنت کہ پاکستانءَ واتر بوتگ اُوں۔ پاکستانءِ تہا بے ترءُ بیمءَ مردمانی گوما گپ کنگ منی واب بوتگ۔ آئیءَ گشتگ کہ انشاء اللہ آؤکیں نسل پاکستانءِ باندات اَنت۔ آئیءَ گشتگ کہ پنچ سالانی تہا ھرجاگہ ءَ شتگ اُوں پاکستانءِ ھوالگءَ ھیال کتگ۔ منی اُمبر کم اِنت بلے من زندءِ تہا بازیں چیزے دیستگ۔ آئیءَ مزن وزیر ءُ مراگشءِ باسکانی شگرءُ منت گپتگ۔ مراگشءِ تہا بنجاھی وزیر سینیٹر مشاہد اللہ خان، وانگءُ زانگءُ کسبی کارانی بنجاھی وزیر انجینئر بلیغ الرحمان ءَ ملالہ یوسف زئی ءَ را دادءُ سلام کتگ ءُ آ ھرچی کنگءَ اِنت پاکستانءِ ھاترءَ پھر اِنت،۔ بنجاھی انجینئر بلیغ الرحمان ءَ گشتگ کہ پاکستانءَ وانگءُ زانگءِ پڑءَ باز ھرچ کتگ۔ حکومتءُ یونیسکو ءَ وانگءُ زانگ ءِ پڑءَ سک باز کار کتگ۔ مراگشءِ باسکانی جستانی پسو داتگءُ ملالہ یوسفزئیءَ گشتگ کہ پاکستانءُ اُلس ءِ ھاترءَ جمہوریت سک باز پاھدگ مند اِنت مارا یکے دومی ءِ ھیال ءُ سرءُ سوج گوشدارگ لوٹ اَنت ۔ آئیءَ گشتگ کہ زالبولاناں ھم کچی ءِ موھءُ وانگءُ زانگءُ جانءُ سلامتی ءَ سر بوھگءَ کار کنگءِ ضلورت اِنت۔ آئیءَ گشتگ کہ پاکستانءِ تہا مھکمیں جمہوریت اِنت ءُ اُلس ءِ جمہوریتءَ گوں بندوکی سک باز ارزشت داریت۔
