بے نظیر انکم سپورٹ پروگرام ءِ بجٹ ءِ تہا مئے دورءَ 50درسد گیشی بوتگ، آؤکیں بجٹءِ تہا گیش گیشی کنگ بیت، اے نیزگارانی ھاترءَ چاگردی پلگاریءِ ھاسیں پروگرام اِت ، اُمیت اِنت کہ نوکیں حکومت ھم اے پروگرام ءَ را جاری داریت
اسلام آباد۔29مارچ(اے پی پی ) مزن وزیر ءِ بے نظیر انکم سپورٹ پروگرام ءِ انڈومنٹ فنڈءِ ھاترءَ یک ارب کلدارءِ جار جتگءُ گشتگ کہ بے نظیر انکم سپورٹ پروگرام ءِ بجٹ ءِ تہا مئے دورءَ 50درسد گیشی بوتگ، آؤکیں بجٹءِ تہا گیش گیشی کنگ بیت،میت اِنت کہ نوکیں حکومت ھم اے پروگرام ءَ را جاری داریت ۔ آ پنچ شمبے ءِ روچءَ بے نظیر انکم سپورٹ پروگرام ءِ ہیڈکوارٹر ءَ بی آئی ایس پی گریجویشن پروگرام ءُ بی آئی ایس پی انڈومنٹ فنڈءِ بندات کنگءِ موھءَ تران کنگءَ بوتگ۔ ایشی ءَ چہ پیسر آئیءَ اے پروگرام آنی دیم درائی کتگ۔ اے موھءِ سرءَ بے نظیر انکم سپورٹ پروگرام ءِ چیئرپرسن ملکی وزیر ماروی میمن ، پاکستانءَ یورپی یونین ءِ سفیر ، این آرایس پی ءِ سروک شعیب سلطان خانءُ بے نظیر انکم سپورٹ پروگرام ءِ سیکرٹری عمر حمید خانءَ ھم تران کتگ۔ مزن وزیر شاہد خاقان عباسی ءَ گشتگ کہ بے نظیر انکم سپورٹ پروگرام ءِ کارءَ را دیمءَ براَنت، بے نظیر انکم سپورٹ پروگرام ءِ ھکداریں مردمانی کمکءِ ھاترءَ ھمک وھدءَ ساڑی اَنت۔ مزن وزیرءَ گشتگ کہ بنجاھی حکومت ءِ امیچو کہ ھرچ اَنت آھانی یک بھرے بے نظیر انکم سپورٹ پروگرامءَ را دیئگ بوھگءَ اِنت، مہ ایشی ءَ را گیش کن اَنت، اے چاگردءِ نیزگاریں ءُ پدمنتیں تبکانی ھاترءَ ءُ نیزگاری ءِ ھلاسی ءِ ھاترءَ چاگردی پلگاری ءِ یک ھاسیں بھر اِت۔ آئیءَ پروگرامءَ راساڑاتگءُ گشتگ کہ کجام ھم چاگردی پلگارگءِ ھاترءَ پروگرام ءِ چاگردءِ تہا بنکی اَرزشتے اَست۔ آئیءَ اُمیت درشا ن کتگ کہ اے پروگرام ءَ چہ پاھدگ چست کنوکیں مردم ملکءِ دیمروئی ءُ وشھالی ءِ تہا وتی کردءَ پیلو کن اَنت۔ آئیءَ گشتگ کہ یکم جونءَ مئے حکومت وتی مدتءَ سرجم کنت ، اُمیت اِنت کہ آؤکیں حکومت اے پروگرامءَ را گیش کنگءَ ھوار اے پروگرامءَ را نیزگاریں مردمانی ھاترءَ جاری کنت ءُ گریجویشن پروگرام ءِ سرءَ ھم ھاسیں دلگوشی کنت۔ آئیءَ گشت کہ بے نظیر انکم سپورٹ پروگرامءَ را سوبمند کنگءَ ماروی میمنءِ کوشست ھم لکھ ستاھ کرز اَنت۔ مزن وزیر ءَ گشتگ کہ بی آئی ایس پی گریجویشن پروگرام ءِ سوبمندی ءِ تہا بی آئی ایس پی ءِ گوما کمک کنگ بہ بیت۔ آئیءَ مراگشءِ تہا ھوار بوتگیں بازیں ملک آنی سفیر ، مزن گسی باسکانی شگرءُ منت گپتگ ۔ مزن وزیر ءَ گشتگ کہ بی آئی ایس پی ءِ ایجوکیشن انڈومنٹ فنڈز ءَ چہ پاھدگ چست کنوکیں زالبول چاگردءِ تہا ھاسیں کرد پیلو کن اَنت۔
