مزن وزیر شاہد خاقان عباسی ءِ چیردستی ءَ یکجائی پاھدگ کونسل ءِ دیوان، راجی آپی پالیسی کنگءِ ضلورت ءِ سرءَ تپاک، صوبائی سر ءُ سوجءَ ھوار کنگءَ پد پالیسی ءِ گڈی منظوری ءِ ھاترءَ یکجائی پاھدگ کونسل ءِ آؤکیں دیوانءَ آرگ ءِ پسیلہ

اسلام آباد۔27مارچ(اے پی پی) یکجائی پاھدگ کونسل ( سی سی آئی ) ءَ راجی آپی پالیسی وتی کنگءِ ضلورت ءِ سرءَ تپاک کتگءُ صوبائی سوجاں ھوار کنگءَ پد ھمے پالیسی ءَ را گڈی منظوری ءِ ھاترءَ یکجائی پاھدگ کونسل ءِ آؤکیں دیوانءَ آرگءِ پیسلہ کتگ۔ یکجائی پاھدگ کونسل ءِ 36می دیوان مزن وزیر شاہد خاقان عباسی ءِ سروکی ءَ سئے شمبے ءِ روچءَ مزن وزیر کارگس ءَ بوتگ کہ آئی ءِ تہا بلوچستان ءِ سروزیر عبدالقدوس برنجو، خیبرپختونخوا ءِ سروزیر پرویز خٹک، سندھءِ سروزیر سیّد مراد علی شاہ ھوار بوتگ اَنت وھدے کہ پنجاپ ءِ نمائندگی ھزانگءِ وزیر ڈاکٹر عائشہ غوث پاشا ءَ کتگ۔ دراھیں صوبہ آنی چیف سیکرٹریز ءُ بنجاھی سیکرٹری آں ابید بنجاھی ءُ صوبائی حکومت آنی سینئر حکام ھوار بوتگ اَنت۔ ڈپٹی چیئرمین پلاننگ کمیشن سرتاج عزیز ءَ دیوان ءَ را راجی آپی پالیسی ءِ مسودہءِ ھوالگءَ الکاپی ءَ چہ سرپد کتگ ۔ اے گپ ءِ سرءَ زور پِردیئگ بوتگ کہ پاکستان گشادی ءِ گوما آپ ءِ کمیءِ آماچیں ملک جوڈ بوھگءَ اِنت، مھکمیں دیمروئی اہدافءِ لوٹ اِنت کہ اے ھوالگءَ گامگیج چست کنگ بہ بیت۔ آباتی ءِ تہا گیشی ءُ معیشت ءِ بازیں پڑآنی تہا آپءِ لوٹ ءِ ردءَ ذخیرہ ءِ گنجاش گیش کنگءِ زوت گامگیج کنگءِ ضلورت اِنت۔ دیوانءَ اے جزم ءِ درشانی کتگ کہ 24نومبر2017ءَ سی سی آئی ءِ دیوانءَ کتگیں پیسلہ ءِ ردءَ تھرڈ پارٹی ءِ وسیلگءَ 5درسد توثیقی مشق کنگ بیت۔ سیکرٹری ھزانگءَ بنجاھی حکومت ءِ نیمگءَ چہ گندم ءَ را مُچ کنگءِ ذخائر ءَ را ایر کنگءِ ھاترءَ پاسکو ءِ نیمگءَ چہ پھجارینتگیں سبسڈی ، یوٹیلیٹی سٹورز کارپوریشن ءِ وسیلگءَ سامان ءِ سرءَ سبسڈی ، رمضان ریلیف پیکج ءُ گندمءُ شکر ءِ برآمد ءِ ھاترءَ رعایتءَ ھوار بازیں چیزآنی سرءَ بنجاھی حکومتءِ نیمگءَ چہ داتگیں بازیں سبسڈی ءِ ھوالگءَ تفصیلی شونشت داتگ۔ پاکستان الائنس فار میتھمیٹکس اینڈ سائنسءَ ھم ملک ءِ تہا سائنس ءُ ریاضی ءِ تعلیم ءِ گیشی ءِ ھاترءَ پریزنٹیشن پیش کتگ۔