قزاخستان، لبنان ، زیمبیا، ایکوٹوریا جینیوءُ منگولیا ءِ نامینتگیں سفیراں سفارتی سند پیش کتگ
اسلام آباد۔27مارچ(اے پی پی ) قزاخستان، لبنان ، زیمبیا، ایکوٹوریا جینیوءُ منگولیا ءِ نامینتگیں سفیراں ملکءِ صدر ممنون حسین ءَ را ایوان صدرءَ یک پُرمڈاھیں مراگشے ءِ تہا وتی سفارتی سند پیش کتگ اَنت۔ ایشی ءَ پد اے سفیرآں صدر ءَ گوں جتاھ جتاھ گندءُ نند کتگ۔ اے موھءِ سرءَ گپ ءُ تران کنانءَ ملکءِ صدر ءَ گشتگ کہ پاکستان دنیاءِ تہا امنءُ ایمنی ، مھکمی ءُ وشھالی ءِ ھاترءَ دراھیں ملک آنی گوما دوستی ءُ براتیں سیادی ءَ را گیش کنگءِ واھشت مند اِنت۔ آئیءَ دونیمگی سیادی ءُ دونیمگی ھدوکی ءِ جیڑھ ءِ سرءَ ھیالءُ لیکہءِ درشانی کتگ۔ صدر ممنون حسین ءَ گشتگ کہ پاکستانءِ معیشت گہتریءِ نیمگءَ رھادگ اِنتءُ ملک زرکاری ءُ بیپاری ءِ مزنیں موھ پیش کنت۔ آئیءَ درملکی سفارت کاراناں بیپاری سُرءُ پر اناں گیش کنگءُ پاکستان ءِ تہا بازیں پڑآنی زرکاری کنگءِ موھاں چہ پاھدگ چست کنگءِ سرءَ زور پِرداتگ۔ سفارتی سند پیش کنوکانی تہا قزاخستان ءِ سفیر برلے بے صدیقوو، لبنان ءِ غسان الخطاب ، زیمبیا ءِ سفیر مس ونی نٹالا ، ایکویٹوریل گنیءِ جرمن ایکوا باگا ءُ منگولیا ءِ جن کھویاگ دانبا ھوار بوتگ اَنت۔ ایشی ءَ چہ پیسر ایوان صدرءَ سر بوھگءَ پاکستان ءُ ھمیں ملک آنی راجی سوت توار گیجگ بوتگ اَنت ءُ سفارتکاراناں گارڈ آف آنر پیش کنگ بوتگ۔
