اسلام آباد۔27مارچ (اے پی پی) جانءُ سلامتی ءِ بنجاھی وزیر سائرہ افضل تارڑ ءَ گشتگ کہ گوستگیں چارسالءُ نیمءِ تہا جانءُ سلامتی ءِ پڑءَ بے مٹیں شری ءُ گامگیج کنگ بوتگ۔ وتی یک بیانءِ تہا آئیءَ گشتگ کہ رکھینگی ٹُکّہءُ ویکسین ءِ پروگرامءَ را گہتر کنگءِ ھاترءَ جوانیں اصلاحات ءِ بندات کنگءَ پاکستانءَ را یک نمونگءِ ارزشتءَ پیش کتگ۔ آئیءَ گشتگ کہ میاں اوستمانی فنڈ ءُ گاوی ءَ چہ پاکستان ءِ ھاترءَ کمک میاں اوستمانی اقتصادی فورم ءِ برکتءَ چہ بوتگ۔ سائرہ افضل تارڑ ءَ گشتگ کہ مزن وزیر ءِ راجی جانءُ سلامتی پروگرام ءِ ردءَ سرجمیں پاکستان ءَ چہ 31لکھ ھانداناں جانءُ سلامتی ءِ آسراتی پھجارینگ بوتگ ءُ نوں سرجمیں ملکءَ نیزگاریں مردمانی سرجمیں آباتی ءَ را اے آسراتی پھجارینگ ءِ ھاترءَ عمل کنگ بوھگءَ اِنت۔ آئیءَ گشتگ کہ آزاد نگراں بورڈ ءُ فنی مشاورتی گروپ وڈیں مزنیں نگران ادارگ آں پولیو ءِ ھلاسی ءِ ھاترءَ پاکستان ءِ کوشستاناں ساڑاتگ۔ جانءُ سلامتی ءِ وزیرءَ گشتگ کہ بنجاھی حکومت ءَ آسراتی ودی کنگءِ ، جانءُ سلامتی ءِ پڑءَ را گیش جوان کنگءُ صوبہ آنی گوما نزیکی گیش کنگءِ ھاترءَ گامگیج کتگ کہ ایشیءِ مولءُ مراد یکجائی اہداف ءِ ھاصل کنگءُ معیاری گامگیج چست کنگ بوتگ۔ آئیءَ گشتگ کہ پاکستان ءَ میاں او ستمانی فنڈ ءِ نوکیں فنڈنگ ماڈل ءِ ردءَ پاکستان ءِ 48آماچیں ضلع آنی تہا ملیریا ءِ ویکسین ءِ ھاترءَ 5کروڑ 20لکھ ڈالر حاصل کتگ۔
