مار ا ترندیں کسبی ءُ تربیت ءُ مشق آنی وسیلگ ءَ وتی دیمپانی منصوبہ بندی ءَ را گہتر ءَ چہ گہتر کنگ ءِ ضلورت اِنت
کراچی ۔ 26مارچ(اے پی پی) پاک بحریہ ءِ آپریشنل مشق رباط 2018ءِ ڈی بریف سیشن دوشمبے ءِ روچ ءَ کراچی ءَ بوتگ۔ چیف آف دی نیول اسٹاف ایڈمرل ظفر محمود عباسی گڈی سیشن ءِ ھاسیں مہمان بوتگ۔ پاک بحریہ ءَ چہ جاری بوتگیں جار ءِ ردءَ وتی گڈی گپانی تہا چیف آف دی نیول اسٹاف ءَ پاک بحریہ ءِ یونٹس ءِ حربی زانت کاری ءُ تیاری آنی سرءَ سرجمءَ سدکّی ءِ درشانی کتگءُ زور پِر داتگ ءُ گشتگ کہ یکجائی آپریشنل مشق ملک ءِ دیمپانی ءِ ھاترءَ المی کسبی تربیت ءُ تیاری ءِ ھاترءَ باز ھاس اَنت۔ آئیءَ اے ھوالگءَ گشتگ کہ اے ھوالگءَ پاکستان نیوی ءُ پاک فضائیہ ءِ نیامءَ یکجائی آپریشنز ءِ سرءَ دلگوشی کنگ بوتگ تنکہ دوھیں سروس آنی نیامءَ دونیمگی نزیکی جوڈ کنگ بہ بیت۔ ایڈمرل ظفر محمود عباسی ءَ اے یکجائی مشق ءِ دراھیں ھوار بوتگیں مردمانی کوشستاناں ساڑاتگ کہ آھاں پچیں زر ءَ آپریشنل منصوبہ آناں راست کتگءُ وتی زانت کاری پیش داشتگ۔ پاک بحریہ ءِ سروک ءَ گیش گشتگ کہ پاکستان نیوی سرجمیں زانتکاریانی گوما بحری زوراک اِ ت کہ دژمن ءِ کجام ھم گامگیج ءَ را ناکام کت کنت۔ آئیءَ گشتگ کہ پاک بحریہ ءِ دراھیں بحری ءُ بالی یونٹس ، افسر ءُ سیلرز ءَ را یکے وھدءَ ہوشیار ءُ جنگی ھسابءَ ساڑی بوھگءِ ضلورت اِنت تنکہ پاکستان ءِ بحری سیمسر ءُ پاھدگاناں جوانی ءَ پلگارگ بہ بیت ۔ آئیءَ گشتگ کہ پاکستان نیوی اے وڈیں یکجائی مشق آنی وسیلگءَ وتی افسر ءُ ورناھ آناں کسبی زانت کاری ءَ گہترءَ چہ گہترکنگءِ عمل ءَ را جاری داریت۔ بحیرۂ عرب ءَ پاکستان نیوی ءُ پاکستان ایئرفورس ءِ نیامءَ یکجائی آپریشنز ءِ عملی تپاسی کنگ اے مشق آنی یک دگہ ھاسیں مولءُ مراد اِت۔
