اسلام آباد۔ 23مارچ (اے پی پی) پاکستان و سری لنکا ہڑتوم آ کنڈآتا تعلقداری و رابطہ غاتے متنوع و سوگوجوڑ کننگ آ امنا کرینو وخت اس کہ سری لنکا نا صدر میتھری پالاسری سینا پاکستان اٹی سارک سرکڑدہ ہی کانفرنس نا اڈتننگ کن پورو کمک فراوان نا پڑو ءِ کرینے۔ دا امنائی سوشلسٹ جمہوریہ سری لنکا نا صدر میتھری پالاسری سینا و پاکستان نا وزیراعظم شاہد خاقان عباسی نا نیام اٹ مروک آ اوڑدہی و اوکان پد ڈل آتا کہول آ مذاکرات اٹی دوئی کننگا۔ جمعہ نادے داڑے جاری بیان نارداٹ وزیراعظم شاہد خاقان عباسی سری لنکا نا صدر تون وزیراعظم ہاؤس اٹی اوڑدہی کرے۔ ہڑتوم آ راہشون تا نیام اٹ اول ون آن ون اوڑدہی مس اوکان پد گرم جوشی نا چاگڑد اٹ ڈل انا کہول آ مذاکرات اڈ ہلک۔ دا اوڑدہی تیٹی تین پہ تینی است خواہی نا معاملہ غاتیا خیال آتا درشانی ءِ کننگا۔ کڑدہ غاک اومیت ظاہر کریر کہ ہڑتوم آ ملک آتا نیام اٹ آخبت اٹ تعلقداریک پین زیات مریرہ۔ کڑدہ غاک پاکستان و سری لنکا ہڑتوم آ کنڈآتا تعلقداری و رابطہ غاتے متنوع و سوگو جوڑ کننگ آ امنا ظاہر کریر۔
