پاکستان جمہوری جہد نا کمک اٹ جوڑ مس، پاکستان نا بقاء ، سلامتی ، یکجہتی ، شونداری و شونہالی نا راز ہم بس جمہوریت اٹی ءِ
اسلام آباد۔ 23مارچ (اے پی پی) وزیراعظم شاہد خاقان عباسی پارینے کہ پاکستان اسہ جمہوری جہد اسے نا کمک اٹ جوڑ مس، اونا بقاء ، سلامتی ، یکجہتی ، شونداری و شونہالی نا راز ہم بس جمہوریت اٹی ءِ، آئین نا شرف و کانود نا بالادستی ءِ المی جوڑ کننگ آن بیدس شرف خنپنہ۔ اوداہیت ءِ یوم پاکستان نا وخت آ تینا کلہو اٹی پارے ہرا (اینو) جمعہ نا دے جوش و جوزہ اٹ اڈتننگک۔ وزیراعظم پارے کہ اینو نا دے 78 سال مست انا ہمو عظیم دے انا یات ترفک ہراتم سویلی ایشیا نا مسلمانک نے مولدی نا زمزیر ءِ کشکنگ و اسہ آجو مسلم ریاست اسے نا جوڑ کننگ نا پرعزم فیصلہ کریسر۔ اوپارے کہ اینو نا ہی دے لاہور نا تاریخی دیوان اٹی مسلم لیگ قائد اعظم محمد علی جناح نا کماشی ٹی ہمو تاریخ ساز قرارداد ءِ منظور کریسس ہرا گڈ اٹی قرارداد پاکستان نا پن اٹ پنی مس۔ داقرارداد مزل نا پیدوار شعور اس تس و بیرہ 7 سال پد پاکستان جوڑ مس۔ دا ہمو مزل ئس ہرانا صفا تصور ءِ علامہ اقبال 1930 ء ٹی پیش کریسس۔ وزیراعظم پارے کہ 23مارچ 1940 ء نا یات گار دے یوم پاکستان نا وڑاٹ اڈ ترسا ننے تینا مستین آ نظر اس شاغسا تینا ساڑی و آخبت نا صورت گری کن غور و فکر کروئی مریک۔ اوپارے کہ ننے تینا سرسہبی تتون اوار اوار تینا ڈیوالائی تا جاچ ءِ ہم ہلوئی مریک۔ پاکستان اسہ جمہوری جہد اسے نا کمک اٹ جوڑ مس۔ اونا بقاء ، سلامتی ، یکجہتی ، شونداری و شونہالی نا راز ہم بس جمہوریت اٹی ءِ۔ آئین نا شرف و کانود نا بالادستی ءِ المی جوڑ کننگ آن بیدس نن شرف خنپنہ۔ اوپارے کہ نن بایدے عہد کین کہ وطن عزیز نا سوگوی و شرفی کن نن اسہ زندہ و پرعزم قوم اسے نا وڑاٹ اقبال و قائد نا فکر و پام ءِ تینا مشعل راہ جوڑ کینہ۔
