پاکستان نا شونداری و سوگوی نا راز بس جمہوریت اٹی ءِ، مون تروک چیلنج آتون مون تننگ کن جمہوری روایت آتے مون آ دننگ المی ءِ
اسلام آباد۔ 23مارچ (اے پی پی) صدر مملکت ممنون حسین پارینے کہ پاکستان نا شونداری و سوگوی نا راز بس جمہوریت اٹی ءِ، مون تروک چیلنج آتون مون تننگ کن المی ءِ جمہوری روایت آتے مون آ دننگے تانکہ راج اٹی رواداری ، ہم آہنگی و سگ شون ہلے۔ اوداہیت ءِ یوم پاکستان نا وخت آ قوم انا پن تینا کلہو اٹی پارے ہرا (اینو) جمعہ نادے اڈتننگ انگ ءِ۔ صدر پارے کہ 23مارچ نا دے ننا قومی تاریخ اٹی اسہ مزل نا خل ءِ ۔ اوداخوشی نا وخت آ مچ آ قوم ءِ دلی مبارکباد پیش کرسا پارے کہ دادے ننا بزرگ آک تاریخی قراردادِ لاہور ءِ منظور کریر ہرا برصغیر نا مسلمان تے اسہ صفا ءُ و عظیم ءُ مسخت اسے کن یکجا کرے۔ صدر مملکت داوخت آ بابائے قوم قائد اعظم محمد علی جناح ؒ ، مصورِ پاکستان ڈاکٹر علامہ اقبال ؒ و تحریک آزادی نا ایلو سرکڑدہ غاتے خراج عقیدت پیش کرے ہراک تینا پکا عزم و بے مثل قربانی تیان پاکستان نا دوئی کننگ نا کسر ءِ آوار کریر۔ اوپارے کہ دا دے ننے یات ترفک کہ پاکستان اسہ مریسءُ جمہوری جہد اسے ٹی جوڑ مس و داسہ دانا شونداری و سوگوی نا راز ہم بس جمہوریت اٹی ءِ۔ ہنداخاطرآن المی ءِ کہ جمہوری روایت آتے مون آ دننگے تانکہ راج اٹی رواداری ، ہم آہنگی و سگ شون ہلے انتئے کہ دافتیان بیدس چیلنج آتون مون تننگ بے کچ مشکل مریک۔ صدر مملکت پارے کہ گدرینگوک آ منہ دہائی ٹی مروک آ دہشت گردی و جنگ و جدل دا مچ آ ڈیہہ بشمول پاکستان ءِ بے وڑ زہمی کرینے۔ اوپارے کہ کنے خوشی ءِ کہ مچ آ قوم یک جان مرسا دا چیلنج نا مقابلہ ءِ کرینو ہراٹی ملک اٹی امن و ایمنی بحال مسنے و معیشت شونداری نا کسر آ روان ءِ۔ پاکستان چین اقتصادی راہداری و ایلو شونداری ڈٹ آک دانا صفا ءُ شاہدی اسے ءُ۔ اوپارے کہ اینو نا دے ننے اسہ وار ولدا داعہد نا تجدید ءِ کروئی مرے کہ نن تینا بزرگ آتا وڑوڈول اٹ چلینگسا پاکستان ءِ گچین جوڑ کینہ۔ اودعا کرے کہ اللہ تعالیٰ ننے پاکستان نا خلوص نیت اٹ خذمت ءِ کننگ نا جوزہ ایتے و پاکستان ءِ شونداری و شونہالی نا کسر آ روان کے۔
