متحدہ عرب امارات (یو اے ای) ، اردن و بحرین نا اولیکو اوار پبی شرکت، ترک ایئر فورس نا شاندار فضائی مظاہرہ
دود انا اعزازی مہمان سری لنکا نا صدر میتھری پالاسری سینا وخت اس کہ مصر انا مفتی اعظم نا خصوصی وڑاٹ شرکت، ایئر چیف مارشل مجاہد انور نا فلائی پاسٹ
اسلام آباد۔ 23مارچ (اے پی پی) پاکستان نا ہرمسٹ آ سلہہ بند فوج آتا 78 می یوم پاکستان آ پبی دفاعی لائخی تا مظاہرہ ءِ کرسا شاندار اسیجائی پریڈ اس اڈ تسر ہراٹی اولیکو وار متحدہ عرب امارات (یو اے ای) نا دستہ، اردن نا ملٹری بینڈ، پیرا شوٹرز، ترکی ایئر فورس انا دستہ تینا تینا ملک آتا نمائندگی ءِ کریر ہرا دا ملک آتون گہری تین پہ تینی سنگتی نا شاہدی اسے۔ پریڈ نا اعزازی مہمان سری لنکا نا صدر میتھری پالاسری سینا ئس وخت اس کہ مصر انا مفتی اعظم خصوصی وڑاٹ شرکت کرے۔ پاک فضائیہ نا سروک ایئر چیف مارشل مجاہد انور فلائی پاسٹ وخت اس کہ ایس ایس جی کمانڈنگ آفیسر میجر جنرل طاہر مسعود بھٹہ فری فال جمپنگ نا سرکڑدہ ہی ءِ کرے۔ پاک فضائیہ نا جے ایف 17 تھنڈر، ایف 16 و شیر دل فارمیشن افق آ زیب دار رنگ تالان کرسا خوبصورت فضائی کرتب نشان تس۔ جمعہ نادے 78 می یوم پاکستان نا وخت آ بنجائی دارالحکومت نا پریڈ گراؤنڈ اٹی شاندار پریڈ اس اڈتننگا۔ صدر مملکت ممنون حسین دا دود انا مہمان خاص وخت اس کہ سری لنکا نا صدر میتھری پالاسری سینا اعزازی مہمان ئس۔ وزیراعظم شاہد خاقان عباسی ، چیئرمین جوائنٹ چیفس آف اسٹاف کمیٹی جنرل زبیر محمود حیات، بری فوج انا سروک جنرل قمر جاوید باجوہ،پاک فضائیہ نا سروک ایئر چیف مارشل مجاہد انور، پاک بحریہ نا سروک ایڈمرل ظفرمحمود عباسی، وزیر دفاع انجینئر خرم دستگیر خان، پارلیمنٹ نا باسک آک، درملکی مندوبین، سفیر، ہائی کمشنر ، ذرائع ابلاغ نا نمائندہ و پاکستانی فنکار آتیان بیدس الس نا بھلو کچ اس پریڈ اٹ شرکت کرے۔ پریڈ نا مہمان خاص صدر مملکت ممنون حسین نا بننگ نا پڑو ءِ بگل ءِ خلسا کننگا ہرا بگی ٹی سوار مرسا صدارتی رکھی دستہ تون اوار دود اٹ سرمس۔ سلامی نا چبوترہ غا وزیراعظم شاہد خاقان عباسی ، سری لنکا نا صدر میتھری پالاسری سینا، آرمی چیف جنرل قمر جاوید باجوہ صدر مملکت ءِ بخیر کریر اوکان پد قومی ترانہ ءِ خلنگا۔ صدر مملکت پریڈ کمانڈر بریگیڈیئر عامر امین تون اوار پریڈ اٹ اوار پنجاپ رجمنٹ ، فرنٹیئر رجمنٹ، نادرن لائٹ انفینٹری ، پاک بحریہ، پاک فضائیہ، مجاہد فورس ، فرنٹیئر کور خیبر پختونخواہ، پاکستان رینجرز، پاکستان پولیس، ٹرائری سروسز لیڈیز، آرمڈ فورسز لیڈز آفیسرز، بوائز اسکاؤٹس، گرلز گائیڈ و ٹرائی سروسز اسپیشل گروپ نا دستہ غاتا معائنہ ءِ کریر اوکان پد پاک فضائیہ و پاک بحریہ نا جہازآتا شاندار فلائی پاسٹ مس ہراٹی جے ایف 17 تھنڈر و ایف 16، میراج ، پی تھری سی اورین، ایف سیون، پی جی سیون، قراقرم ایگل، سیپ 2000 ، کے ای تھری اواکس تون اوار چندی جنگی و جنگی جہاز آک بشخ ہلکر ۔ فضائی مارچ پاسٹ انا سرکڑدہ ہی ءِ پاک فضائیہ نا سروک ایئر چیف مارشل مجاہد انور کرے۔
