اسلام آباد۔ 23مارچ (اے پی پی) اسپیکر قومی اسمبلی سردارایاز صادق و قائم مقام اسپیکر قومی اسمبلی مرتضیٰ جاوید عباسی یوم پاکستان نا پروقار وخت آ تینا جتاجتا کلہو آتے ٹی قوم ءِ مبارکبادی ترسا پارینو کہ 23مارچ نا دے برصغیر نا تاریخ اٹی اسہ جتا ءُ ہند اس تخک۔ اسپیکر قوم انا پن تینا تہنیتی کلہو اٹی پارے کہ 78 سال مست اینو نا دے سویلی ایشیانا مسلمانک قائد اعظم محمد علی جناح نا کماشی ٹی تینکن جتا ءُ وطن اسے نا دوئی کن جہد کننگ نا عہد کریر و قراردادِ لاہور منظور کریر ہرادے اوکان پد قرارداد پاکستان نا پن تننگا۔ داقرارداد مسلمان تے پوسکن ءُ سمت و سوچ اس تس و تحریک آزادی ءِ پوسکن ءُ جوش و ولولہ اس تس۔ اوپارے کہ قائد اعظم اسلام نا امن و سگ و سینہ و انسانیت تون مابت نا اصول ءِ تینا زند انا بشخ جوڑ کرے ہراڑآن نئے بیرہ مسلمانان ہند بلکن برصغیر اٹی رہینگوک آ ایلو اقلیت آک ہم زہمی مسر و مسلمان تے کن اسہ جتا ءُ وطن اسے نا خواست نا تحریک اٹی اوار مسر۔ اسپیکر قائد اعظم نا کماشی ءِ خراج تحسین پیش کرسا پارے کہ قائد اعظم نا مدبرانہ کماشی و مسخت نا دوئی تون سچی لگن نا کمال ئس کہ قرارداد پاکستان نا منظوری نا بیرہ ہفت سال نا چنکو وخت اسے ٹی مسلمانک اسہ پرامن جہد اسے نا کمک اٹ غٹ تر مشکل و مصائب آتا باوجود تینکن اسہ جتا ءُ وطن اس دوئی کننگ اٹ سرسہب مسر۔ سردارایاز صادق پارے کہ یوم پاکستان تجدید عہد وفانا دے ءِ کہ اینو نا دے ننے بحیثیت مجموعی اسہ ایلو نا اختلاف آتے گیرام کرسا ملک انا جوڑ جاڑ و شونداری کن سیوت و قائد نا سیوت، ایمان و تنظیم نا راہشون اصول آتے تینا کننگ نا عہد کروئی مریک۔ قائم مقام اسپیکر مرتضیٰ جاوید عباسی پارے کہ داقرارداد آزادی نا تحریک اٹی اسہ پوسکن ءُ زند اس شاغا و مسلمان تے اسہ مسختءُ عظیم اس نا دوئی کننگ کن اسہ پلیٹ فارم اسے آ یکجا کرے۔ ہڑتوم آ سرکڑدہ غاک باوری ترفیر کہ پارلیمان و ساڑی آ حکومت دا مملکت خداداد نا تہذیب ، دودوربیدگ میرات و قدر انا رکھ اکن پرعزم ءُ۔ اوفک پاریر کہ قرارداد پاکستان ءِ مون آ تخنگ اٹی ہی ملک اٹی معاشی و راجی انقلاب اتنگ نا پبی کوشست آتے برجاتخنگک۔
