مئے راج دپترءِ تہا 23مارچءِ وڈیں دگہ روچ نیست چیا کہ اے روچءَ مئے پیریناں پیسلہ کتگ کہ درملکی واجہ ءُ نہ ھکی ءِ عمل ءَ را پروش دیئگ بیتءُ وتی بھتءِ واجہ وت جوڈ بیاں
اسلام آباد۔23مارچ (اے پی پی) ملک ءِ صدر ممنون حسین ءَ گشتگ کہ مئے راجی دپترءِ تہا 23مارچءِ وڈیں دگہ روچ نیست اے روچءَ مئے پیریناں پیسلہ کتگ کہ درملکی واجہ ءُ ناھکاناں پروش دیئگ بیتءُ وتی بھتءِ واجہ وت جوڈ بہ باں ۔ اے ھیالانی درشانی ملکءِ صدرءَ جمعہ ءِ روچءَ پریڈ گراؤنڈ ءَ پاکستانءِ روچءِ موھءَ ھڈ داتگیں مراگش ءَ گوں تران کنانءَ کتگ۔ اے موھ سرءَ صدر سوشلسٹ جمہوریہ سری لنکامیتھری پالا سری سینا، مزن وزیر شاہدخاقان عباسی ، چیئرمین جوائنٹ چیفس آف سٹاف کمیٹی جنرل زبیر محمود حیات ، آرمی چیف جنرل قمر جاوید باجوہ ، ایئرچیف مارشل مجاہد انور خان ، نیول چیف ظفر محمود عباسی ، دیمپانی ءِ وزیر انجینئر خرم دستگیر خان ، بازیں ملک آنی سفیر ، مز ن گسی باسک، بنجاھی وزیر ، بازیں ملک آنی فوجی افسر ءَ ھوار اُلسءِ مزنیں کساسے ھوار بوتگ۔ ملک ءِ صدرءَ گشتگ کہ 23مارچ1940ءَ مئے پیریناں یک انچیں جدید ، ترند ءُ مھکم ءُ جمہوری ملک جوڈ کنگءِ جزم کتگ۔ آئیءَ گشتگ کہ پاکستان ءِ فوج ھمے جوشءُ جزبگ ءِ ردءَ اقوام متحدہ ءِ پلیٹ فارم ءَ چہ دنیاءِ بازیں بھرآنی تہا امنءُ ایمنی جوڈکنگءِ ھاترءَ بے مٹیں ازمت دیئگءَ اِنت۔ ملکءِ صدرءَ گیش گشتگ کہ خطہ ءِ اے جاورھال یک جتاھیں میاں اوستمانی نظام ءِ ردءَ بوتگیں وئیلانی نتیجگ اِنت بلے ایشی ءِ تہا میاں اوستمانی سیاسی نظام یک بنجاھ ءِ پابند نہ بوتگ ۔ ملکءِ صدرءَ گشتگ کہ روبرکت ءَ مئے ھمسائگ وتی فوجی زوراکی ءِ تہا یکوئی ءَ گیشی کنگ ءَ اَنت، لائن آف کنٹرول ءُ ورکنگ باؤنڈری ءِ سرءَ ناھکی کنگ بوھگءَ اِنتءُ بے گناھیں شہرآنی جانءُ مال ءَ را نقصان دیئگ بوھگءَ اِنت ءُ مئے ھمسائگءَ وتی اے وڈیں کارءُ کردءَ چہ خطہءِ امنءُ ایمنی ھراب کتگ۔ ملکءِ صدر ءَ بھارتءَ ر ا کھڈن کتگءُ گشتگ کہ کشمیرءِ تہا زُلمءُ ناھکی ءَ را بند بہ کنت، پاکستان کشمیری ءِ مردماناں وتی وت واجہی ءِ مول ءُ مرادءَ را پیلو کنگءِ ھاترءَ وتی کردءَ پیلو کنت۔ ملکءِ صدرءَ گشتگ کہ گوستگیں بازیں سالاں خطہ ءِ تہا بوتگیں مٹءُ بدلی ءُ جنگءُ جدل ءَ دمگ ءِ امنءُ ایمنی تباھ کتگ کہ ایشیءَ چہ پاکستان ھم آماچ بوتگ۔ آئی ءَ گشتگ کہ پاکستانی راج ءُ پاکستانءِ فوج ءَ آپریشن ضرب عضب ءُ ردالفساد وڈیں کاروائی ءِ وسیلگءَ چیلنج ءِ دیمپانی سرجمیں جزم ءُ ہمت ءَ چہ کتگ۔ آئیءَ گشتگ کہ دو گچین بوتگیں جمہوری حکومت ھم وتی مدت سرجم کنگءَ سوبمند بوتگ ، اے جیڑھ آنی سرءَ بازیں تبک اگاں تکانسری کنگءَ اِنت گڈا المی اِ نت کہ آھانی سرءَ سرجمیں دلگوشی کنگ بہ بیت تنکہ ناشرکاری ءَ ھوار سرجمیں راج زندءِ بازیں پڑاں سوبمند بہ بیت۔ ملکءِ صدرءَ اے موھءَ ناشرکاری ءُ بیم کاری ءِ ھلاس کنگءِ ھاترءَ داتگیں قربانی آنی ھاترءَ سلاھ بندیں فوج ءُ کانود نافذ کنوکیں ادارگانی ھاترءَ یک نوکیں داد’’ تمغہ عزم‘‘ ءِ جار جتگ۔ آئیءَ پاکستان ءِ روچءِ موھءَ پرمڈاھیں پریڈ ءِ جوانیں برجمی ءِ سرءَ پریڈ کمانڈر ، ھوار بوتگیں مردم ، ھندی انتظامیہ ءُ ضلعی حکومتءَ را شاباش داتگءُ گشتگ کہ مارا وتی افسرءُ ورناھ آنی سرءَ پھر اِنت۔ آئیءَ وتی بہادریں افسر ءُ و رناھ آناں سرءُ سوج کتگ کہ ءُ گشتگ کہ آ ملک ءُ ملت ءِ رکھینگ ءُ سلامتی ءِ ھاترءَ بہادری ، نیک نیتی ءُ ایمانداری ءَ ھوار وتی آئینی زمہ واری ءَ پیلو کن اَنت ءُ اے شرپ مندیں فرض ءِ ادا کنگءَ وتی ھم وطنءَ را گوں وت ھم کوپگ گند اَنت۔
