اسلام آباد۔22مارچ(اے پی پی) ملکءِ صدر ممنون حسین ءَ گشتگ کہ پاکستان جوانیں موھءِ سرڈگار اِنت کہ ایشی ءَ چہ مئے دوستءُ سنگتیں ملک ھاس وسطی ایشیائی ملک درسا چہ گیش پاھدگ چست کُت کن اَنت۔ پاک چین اقتصادی راہداری ءِ جوڈ بوھگءَ پد وسطی ایشیائی ملک آنی ھاترءَ پاکستان ءَ بازیں پڑآنی تہا زرکاری ءِ بازیں موھ پیداک بوتگ اَنت کہ اے ملک آنی ھاترءَ پاھدگ اِنت۔ اے گپ آئیءَ ’’ پاکستان: موھءِ سرڈگار‘‘ ءِ سرھال ءِ میاں اوستمانی سیمینار ءِ سینئر مندوبین ءِ ڈل ءَ گوں گپءُ تران کنانءَ کتگ کہ آھاں ایوان صدرءَ گندءُ نند کتگ۔ اے موھءِ سرءَ نیشنل سکیورٹی ایڈوائزر لیفٹیننٹ جنرل ناصر جنجوعہ، ھمگرنچیں ملک آنی سفیر ءُ دگہ مزنیں حکام ھم ساڑی بوتگ اَنت ۔ آئی ءَ گشتگ کہ پاکستان چین اقتصادی راہداری ءِ جوڈ بوھگءَ پد خطہ ءِ تہا دیمروئی ءُ وشھالی ءِ ھاترءَ سک باز نوکیں موھ ودی بنت کہ ایشیءَ چہ ایشیائی ملک ھاس پاھدگ چست کُت کن اَنت۔ اے مولءُ مرادءِ ھاترءَ المی اِنت کہ پاکستان ءُ خطہ ءِ دگہ ملک آنی نیامءَ سرکاری ءُ درسرکاری ، دوھیں تکءَ سیادی گیش کنگ بہ بیت۔ زند ءِ بازیں تکءُ پھناتاں چہ سیادی داروکیں ڈل گیشاں چہ گیشءَ ترءُ تاب بہ کن اَنت تنکہ زانتکارءُ کواس اے ملک آنی تہا کار کنگءِ موھءَ دربہ گیج اَنت ءُ آھانی پاھدگءَ را اُلسءِ دیمروئی ءُ وشھالءِ ھاترءَ کارمرز بہ کن اَنت۔ حکومت پاکستان ءَ آپریشن ضرب عضب ءُ ردّالفساد ءِ وسیلگءَ ناشرکاری ءَ را گرءُ دار کتگ۔ ایشیءَ ابید ڈلءِ تہا ازبکستان ءِ پیسرگیں نائب مزن وزیر ءُ چیمبر آف کامرس ءِ چیئرمین اکراموآدم الہا مووچ، نیشنل انسٹی ٹیوٹ آف اسٹریٹجک اسٹیڈیز کرغزستان ءِ بیدولیتوف نورادل ایسن بکووچ، قزاقستان انسٹیٹیوٹ برائے اسٹرٹیجک اسٹیڈیزءِ جارجے دبووٹسو،تاجکستان ءِ سنٹر برائے اسٹریٹجک اسٹیڈیز ءِ ڈائریکٹرخدابردی خلیق نظر، ترکمانستان ءِ نائب وزیر برائے معیشت مردان بیرام دردیوو ءَ ابید جمہوریہ کرغز، قزاقستان ، ازبکستان، تاجکستانءُ ترکمانستان ءِ سفیر ھم ساڑی بوتگ اَنت ۔
