اسلام آباد۔ 21مارچ (اے پی پی) پاک فوج انا شعبہ تعلقات عامہ (آئی ایس پی آر ) وزیراعلیٰ تا کلہو آتیا تالان ’’امن نا نشان پیارا پاکستان‘‘ نا سرحال آن پوسکن ءُ پرومواس جاری کرینے۔ ڈائریکٹر جنرل آئی ایس پی آر میجر جنرل آصف غفور نا ٹوئٹ نا کمک اٹ یوم پاکستان نا بابت جاری کروک آ پوسکن آ پروموٹی وزیراعلیٰ پنجاپ محمد شہباز شریف پارے کہ 23مارچ نا بننگ بننگ ءِ، مچ آ قوم ءِ است انا ھب اٹ مبارکباد پیش کیوہ۔ وزیراعلیٰ خیبر پختونخواپرویز خٹک پارے کہ پاکستان نا آجوئی کن ننا باوہ و پیرہ بھاز قربانی تسنو، ببو نن غٹ اواری اٹ پاکستان نا شونہالی کن تینا کڑد ءِ ادا کین۔ وزیراعلیٰ بلوچستان عبدالقدوس بزنجو پارے کہ یوم پاکستان آ مبارکباد پیش کیوہ، ننے غٹ ءِ اواری اٹ دا ملک انا رکھ و شونداری ٹی کڑد ءِ ادا کروئی ءِ۔ وزیراعلیٰ سندھ مراد علی شاہ پارے کہ ہرپاکستانی توار کرے پاکستان امن نا نشان ننا پاکستان ءِ۔ وزیراعلیٰ گلگت بلتستان حافظ حفیظ الرحمان پارے کہ 78می یوم پاکستان آ مچ آ قوم ءِ مبارکباد پیش کینہ۔
