اسلام آباد۔21مارچ (اے پی پی) پیسرگیں مزن وزیر محمد نواز شریف ءَ گشتگ کہ من ادارگ آنی شرپءُ عزت کنوکیں مردمے اوں ، آمید گسانی ھاترءَ روانک ھم در کتگ، ھرچ پیسلہ کنگ بوتگ منی ءُ راجءِ چماں شر نہ اِنت، عمران خان وتی جرمءَ منگءَ اِنت بلے آئیءَ را صادقءُ امین گشگ بوھگءَ اِنت۔ احتساب آمید گس ءَ فلیگ شپ انویسٹمنٹ ءُ العزیزیہ سٹیل ملزریفرنس ءِ کیسءِ گوشدارگ ءِ موھءَ ھال درءِ گوما گپءُ تران کنانءَ پیسرگیں مزن وزیر محمد نواز شریفک ءَ گشتگ کہ بلیک لاء ڈکشنری ءِ نامءَ منءَ منی بچءَ چہ پگار زورگ ءِ سرءَ نابود کنگ بوتگ، من چوں اے پیسلہ ءَ را من اِیں؟ آئیءَ گشتگ کہ پاکستان تحریک انصاف ءِ چیئرمین عمران خانءَ ھم گشتگ کہ پاناما ءِ پیسلہ نیزوریں پیسلہ اِت، نوں آمید گسانی تہاءُ ڈنءَ زوراں چہ توار چست بوھگءَ اَنت۔ پیسرگیں مزن وزیر ءَ گیش گشتگ کہ عمران خان وتی کتگیں کاراں منگءَ اِنت بلے آئیءَ را گشگ بوھگءَ اِنت کہ آ صادقءُ امین اِت ، گیش دور رؤگ مہ بیت ، اے صادقءُ امین ءِ گوستگیں دو سئے ماھ ءِ داستان وانگ بہ بیت۔ آئیءَ گشتگ کہ شیخ رشید ءَ 113کنال ءِ زمین چیرداتگ ، یک کنالے زمین یک کروڑءَ چہ کم نہ اِنت، شیخ رشید گشیت کہ 4کروڑ کلدارءِ جاگہ ءِ ھال دیئگءِ شموشتگ ۔ اے موھءِ سرءَ یک صحافی ءِ جست کتگ کہ اگاں تئی ھیالءَ ناانصافی بوتگ تئی گوما گڈاتو سپریم جوڈیشل کونسل ءَ روئے؟ ایشی ءِ سرءَ نواز شریفءَ گشتگ کہ تو منءَ شریں سوجے داتگ تئی سوجءِ لکھ منت۔
