اسلام آباد۔ 21مارچ (اے پی پی) سیکرٹری خارجہ تہمینہ جنجوعہ پارینے کہ پرامن و سوگو اوغانستان پاکستان نا فائدہ ٹی ءِ ، ہڑتوم آ ملک آتا الس اوغانستان اٹی پین جنگ ءِ سگنگ کپسہ ، ڈیہہ ٹی پائیدار امن کن کشمیر نا ویل ءِ زوت، صاف و الس نا است خواہی و اقوام متحدہ نا قرارداد آتا رداٹ ایسر کروئی مریک، سی پیک دے ٹک نیامی و نیام ایشیانا نیام اٹ پول انا کڑد ءِ ادا کیک، پاکستان اقتصادی کمکار تنظیم نا رداٹ تاپی گیس پیپ لین ڈٹ اکن سنجیدہ کوشست کننگ ءِ۔ داخیال آتا درشانی ءِ اوچارشنبے نادے ’’پاکستان مشرق وسطیٰ کے ممالک کے لئے مواقع کی سرزمین ‘‘ نا بابت سیمینار آن تران کرسا کرے۔ داوخت آ بنجائی وزیر داخلہ ، ڈٹ بندی ، شونداری و اصلاحات پروفیسر احسن اقبال ، وزیراعظم نا سلاہکار قومی سلامتی لیفٹیننٹ جنرل (ر) ناصر خان جنجوعہ ، سنٹر فار گلوبل اینڈ اسٹریٹجک سٹڈیز اسلام آباد نا صدر میجر جنرل (ر) سید خالد عامر جیفری، تاجکستان نا سنٹر فار اسٹریٹجک سٹڈیز نا ڈائریکٹر خودوبردی، ازبکستان نا مسکوہی نائب وزیراعظم و ازبکستان چیمبر آف کامرس اینڈ انڈسٹری نا ساڑی آ صدر اکرامووف ادخم، آل پاکستان نیوز پیپر سوسائٹی نا صدر سرمدعلی و قزاخستان انسٹی ٹیوٹ اسٹریٹجک سٹڈیز نا چیف ریسرچ فیلو تون اوار بھلو کچ اسے ٹی شریک مروک آک ساڑی ئسر۔
