اسلام آباد۔21مارچ(اے پی پی) مزن وزیر شاہد خاقان عباسی ءَ وانگءُ زانگ ءَ را گیش کنگءَ را وھدءِ ضلورت لیک اِتگءُ گشتگ کہ وانگءُ زانگ ءُ اخلاقیات یکے دومی ءِ گوما بندوک اَنت، اخلاقیاتءُ اقدارءَ سرءَ جوڈبوتگیں پیسلہ مھکم ءُ مزنیں حوصلگءِ سوب بنت۔ اے ھیالانی درشانی آئیءَ چارشمبے ءِ روچءَ مزن وزیر کارگس ءَ یک نجی وانگ جاھ ءِ چیردستی ءَ ’’ اقدارءِ سرءَ جوڈ بوتگیں تعلیم‘‘ ءِ ھوالگءَ کانفرنس 2018ءَ گوں تران کنانءَ کتگ۔ ھالءُ اھیوال کاری ءُ شنگکاری ءِ ملکی وزیر مریم اورنگزیب ءُ دگہ مردماں کانفرنسءِ گوما تران کنانءَ کتگ۔ مزن وزیر ءَ گشتگ کہ اے وڈءِ کانفرنس ءِ ھڈ کنگ مزنیں گامگیج اِت، انوں اقدارءِ سرءَ جوڈ بوتگیں وانگءُ وانگءِ ضلورت اِنت۔ آئی ءَ گشتگ ک تعلیم ءُ اخلاقیات ءِ نیامءَ ھم کچی نیست ، اقدارءِ سرءَ جوڈ بوتگیں پیسلہ کنگ باز گرانیں پیسلہ اَنت بلے اگاں اے وڈیں پیسلہ کنگ بہ بیت سک باز مھکم بنت ۔ آئیءَ گشتگ کہ دراج مدتی پیسلہ گندگءَ گیش نامدار نہ بنت بلے آ گیش مھکم الم ءَ بنت۔ آئی ءَ گشتگ کہ راھ دربرءُ ماتءُ پتاناں نودربرانی تہا چاگردی اقدارءِ گیش کنگءِ ھاترءَ وتی کرد پیلو کنگ لوٹ اِیت۔ اے موھءِ سرءَ سٹی سکول نیٹ ورک ءُ مزن وزیر کارگس ءِ نیامءَ مزن وزیر یوتھ کنیکٹ پروگرام ءِ ردءَ وانگءُ زانگ ءِ گیش کنگءِ ھاترءَ یک تپاک نامہے ءِ سرءَ دستخط ھم کنگ بوتگ اَنت۔ مزن وزیر گارگسءِ نیمگءَ چہ بنجاھی سیکرٹری اکبر حسین درانی ءُ سٹی وانگ جاھءِ نیمگءَ چہ چیف آپریٹنگ آفیسر شہزاد خانءَ تپاک نامہ ءِ سرءَ دستخط کتگ۔ اے موھءِ سرءَ مزن وزیر شاہد خاقان عباسی ھم ساڑی بوتگ۔ ایشی ءَ چہ پیسر چیئرپرسن سٹی وانگ جاھ نیٹ ورک ڈاکٹر فرزانہ فیروز ءَ مراگشءَ گوں تران کتگءُ گشتگ کہ زھگاناں گہتریں تعلیم دیئگءُ آھانی گوما شریں تبءُ میل دارگ گہتریں شرپ ءِ تہا ھوار اِنت۔ آئیءَ گشتگ کہ سٹی وانگ جاھءِ اولی کیمپس ءِ جوڈ کنگءَ مزن وزیر شاہد خاقان عباسی ءِ پتءِ مزنیں کردے اَست اِنت۔ اے موھءِ سرءَ تعلیمی کواس ڈاکٹر حرینہ جتوئی، ڈاکٹر عرفان حیدر ءُ سائرہ نسیم ءَ ھم تران کتگ۔ کانفرنس ءِ تہا مزن وزیر ءِ ھال درءِ پڑءِ ھاسیں کمک کار مصدق ملک ، ڈائریکٹر جنرل ہائرایجوکیشن کمیشن پنجاپ شاہد سروہا، سپرٹ آف میتھ کینیڈا ءِ نمائندگ کم لنگ جن ءُ نامداریں صحافی حامد میر ءَ باست ءُ واستی پینل ءِ تہا بھر زُرتگ تعلیمی پڑءِ تہا اقدارءِ گیش کنگءُ زھگاناں جوانیں وانگءُ زانگءِ پھجارینگ ءِ ضلورتءَ را پدر کتگ۔ آئی ءَ اے ھوالگءَ وتی جندءِ تجروبت ھم پیش کتگ اَنت۔
